වස්කඩුව ගාලු පාරේ තෙමහල් ගොඩනැඟිල්ලකින් ඇද වැටී කාන්තාවක තුවාල ලබා රෝහල්ගත කර ඇති බව කළුතර උතුර පොලීසිය පවසයි.
මෙසේ රෝහල්ගත කර ඇත්තේ මාතර, වැලිගම ප්‍රදේශයේ පදිංචි 29 හැවිරිදි කාන්තාවක බව පොලීසිය පවසයි.
රෝහල්ගත කර ඇති කාන්තාවගේ සැමියා ඇයව හැර දමා අනියම් බිරිය සමඟ එම තෙමහල් ගොඩනැඟිල්ලේ ඉහළම මහලේ මාස තුනක පමණ සිට පදිංචිව සිට ඇත. ඇය හෝමාගම ප්‍රදේශයේ සුපිරි වෙළෙඳසලක රාජකාරි කරමින් සිට ඇති අතර, දින දෙකකට පෙර තවත් පුද්ගලයෙකු සමඟ මෝටර් රථයකින් බලහත්කාරයෙන් රැගෙන විත් රඳවාගෙන සිට ඇති බවට තොරතුරු ලැබී ඇතැයි ද පොලීසිය පවසයි.
රෝහල්ගත කර ඇති කාන්තාව පෙරේදා (19) රාත්‍රී රෙදි පටිවලින් සැකසූ ආධාරකයකින් ජනේලයකින් පැන පහළට බැසීමට උත්සාහ කිරීමේදී ඇද වැටී ඇති බවට මෙතෙක් කළ පරීක්ෂණවලදී හෙළිව ඇතැයිද පොලීසිය පවසයි.
තුවාල ලැබූ කාන්තාව කළුතර ශික්ෂණ රෝහලේ ප්‍රතිකාර ලබමින් සිටින බව රෝහල් ප්‍රකාශකයෙක් පැවසීය.
සැකකාර සැමියා සහ ඔහුගේ අනියම් බිරිය ද, තුවාල ලැබූ කාන්තාව මෝටර් රථයක නංවාගෙන පැමිණි අනෙක් පුද්ගලයා ද අත්අඩංගුවටගෙන තිබේ.
සැකකරුවන් කළුතර මහේස්ත්‍රාත් අධිකරණයට ඉදිරිපත් කිරීමට නියමිතව ඇත.
