සමාජයෙන් ඈත්ව විවිධ බෝ නොවන රෝගවලට ලක්වෙමින් හා මානසික පීඩා මැද ජීවත්වූ වැඩිහිටි පරපුර ඉන් මුදා ගනිමින් ඔවුන්ගේ කුසලතා හා හැකියාවන් ඔස්සේ සමාජයට ලබාදිය හැකි සේවා හා මග පෙන්වීමට හැකි නීරෝගි ජීවිතයක් ලබාදීමේ අටියෙන් ඌවපරණගම දිසා රෝහලේ වෛද්‍ය කාර්ය මණ්ඩලය විසින් වැඩිහිටි ශරීර සුවතා වැඩ සටහනක් දියත්කර තිබේ. සතියකට එක් දිනකදී බෝ නොවන රෝගවලට ලක්ව ඌවපරණගම දිසා රෝහලෙන් ප්‍රතිකාර ලබන වැඩිහිටි රෝගීන් වෙනුවෙන් මෙම ශරීර සුවතා සරල ව්‍යයාම සිදු කරයි. ඌවපරණගම දිසා රෝහලේ ප්‍රධාන වෛද්‍ය ඩබ්ලිව්.පී.එස්. උදය මහතාගේ සංකල්පයට අනුව මෙය ක්‍රියාවට නංවා තිබේ. මෙහිදී බෝ නොවන රෝග ප්‍රතිකාර ලබන වයස අවුරුදු 60ට වැඩි වැඩිහිටියන්ට පහසු ව්‍යයායාම් සමූහයක් හඳුන්වා දී තිබේ. මෙම ව්‍යායාම් සඳහා සම්පත්දායකයකු ලෙසින් සටන් කළ උපදේශක හා විශ්‍රාමික මහජන සෞඛ්‍ය පරීක්ෂක ජයවීර ජයසුන්දර මහතා ස්වේච්ඡාවෙන් ඉදිරිපත්ව සිටී.
ඌවපරණගම, අඹගස්දෝව, අම්පිටිදෝව පදිංචි ගර්ටි ගුණවර්ධන මහත්මිය (74) මෙසේ පැවැසුවාය. මම අධික රුධිර පීඩන රෝගයෙන් පෙළෙනවා. මෙයට අමතරව දැනට වසරකට පෙර රාත්‍රියට නින්ද නොයාමේ තත්ත්වයක් ද ඇතිවුණා. මෙය මට විශාල මානසික පීඩාවක් ගෙන දුන්නා. මම ඌවපරණගම දිසා රෝහලෙන් අධික රුධිර පීඩනයට බෙහෙත් ගැනීමට පැමිණි අවස්ථාවේ බෝ නොවන රෝගී වැඩි හිටියන් වෙනුවෙන් බ්‍රහස්පතින්දා දිනවල උදෑසන 09.30ට ආරම්භ කරන ව්‍යායාම් වැඩසටහනට එක්වන ලෙසට පැවැසුවා. ඒ අනුව මම මෙම වැඩිහිටියන් වෙනුවෙන් බ්‍රහස්පතින්දා දිනවල රෝහල් භූමියේ පවත්වන ශරීර සුවතා සරල ව්‍යායාම් වැඩ සටහනට අතපසු නොකර සහභාගි වුණා. අද වන විට තිබූ ලෙඩ සියල්ල සුව වෙලා. දැන් රාත්‍රියට හොඳින් නින්ද යෑම නිසා විශාල මානසික සුවයක් ඇතිවෙලා. දැන් ඉතාමත් ක්‍රියාකාරීව නිදහසේ කිසිවකුටත් බරක් නොවී මගේ වැඩකටයුතු ඉටුකර ගන්නවා.
මෙසේ සරල ව්‍යායාම් වැඩ සටහන්වලට පැමිණෙන අයට පරිත්‍යාගශීලීන් කොළ කැඳ ඇතුළු විවිධ ආහාර අපිට ලබා දෙනවා.
මෙම වැඩිහිටි සරල ව්‍යායාම් අවසානයේදී අපි සිංදු කියනවා. කවි කියනවා. අපි නටනවා. අපේ සැඟව තිබෙන සියලුම කුසලතාවයන් මතුකර ගනිමින් විනෝද වෙනවා. මේ හරහා අපිට ලැබෙන මානසික සතුට වචනයෙන් කියා නිම කරන්න බෑ. මෙහිදී අපි රෝගී බවින් මිදී නිරන්තරයෙන් තරුණ අවධියට රැගෙන යනවා කීවොත් වඩාත් නිවැරැදියි.
ඌවපරණගම දිසා රෝහලේ දිසා වෛද්‍ය ඩබ්ලිව්.පී.එස්. උදය මහතා. “වැඩිහිටියා ඇති වැඩකට නැති“ තේමාව යටතේ සමාජයෙන් ඈත්කර හුදකලාවේ මානසික හා විවිධ බෝ නොවන රෝගවලට ගොදුරුව සිටි වැඩිහිටියන් වෙනුවට වැඩිහිටි අපිටත් දැනුම් සම්භාරයක් සහිත විවිධ කුසලතා හා හැකියාවන් තවමත් ශරීරයේ පවතින බවට සමාජයට කියාදීමේ අරමුණ ඇතිව මානසික හා රෝග පාලනය සඳහාත් අපේ රෝහලේ බෝනොවන රෝග ප්‍රතිකාර සඳහා සරල ශරීර සුවතා ව්‍යායාම වැඩසටහන ආරම්භ කළා. මොවුන්ගේ සහභාගිත්වයෙන් ලෝක වැඩිහිටි දිනය සමරමින් නැටුම් ගැයුම් විනෝද ක්‍රීඩා පවත්වනවා. විවිධ ජන ක්‍රීඩා පවත්වමින් වැඩිහිටියන්ගේ යට ගිය සුන්දර අතීත මතකයන් නැවතත් අවදි කරනවා. මේ නිසා මෙම වැඩසටහනට දිනපතා සහභාගිවන පිරිසත් වැඩි වෙනවා. අද වනවිට එම පිරිස් ඉතා ක්‍රියාශීලී පුද්ගලයන් බවට නැවතත් වේගයෙන් පත්වන බව ඉතාමත් සතුටෙන් කියන්න ඕනෑ. මෙම ව්‍යායාම හේතුවෙන් බෝ නොවන රෝගවලින් පෙළෙන හා වයස්ගතවීම මත ශරීරයට සිදුවන අපහසුතා නිසා පීඩාවට පත්ව රෝග ප්‍රතිකාර ලබාගැනීමට පැමිණෙන වැඩිහිටි පිරිස කෙටි කාලයකින් නීරෝගි පිරිසක් බවට පත්වෙනවා. ඒ හරහා ඔවුන් වෙනුවෙන් නිකුත් කරන ඖෂධ ප්‍රමාණය අවම වීමෙන් රජයටත් ඒ සඳහා වැයවන මුදල ඉතිරිවීමක් සිදුවනවා.
