පොලොන්නරුව, දිඹුලාගල සහ වැලිකන්ද කොට්ඨාසයේ මේ දිනවල නිරන්තරව පවතින වනඅලි තර්ජන හේතුවෙන් ගම්මාන රැසක ගොවි ජනතාව දැඩි අසීරුතාවට පත්ව සිටිති.
වැලිකන්ද ප්‍රාදේශීය ලේකම් කොට්ඨාසයේ ගම්මාන රැසකට මෙන්ම දිඹුලාගල ප්‍රාදේශීය ලේකම් කොට්ඨාසයේ මනම්පිටිය, මෙත්සිරිගම, සිංහඋදාගම, දළුකාන මෙන්ම ගම්මාන රැසක සැරිසරන වනඅලි රංචුවක් තමන්ගේ නිවාසවලට පූර්ණ හා අර්ධ වශයෙන් හානි සිදු කරමින් තිබෙන බව ගොවීහු පෙන්වා දෙති. ඔවුන් කියා සිටියේ, ගතවූ සතිය ඇතුළත මනම්පිටිය, මහවැව, මෙත්සිරිගම, සිංහ උදාගම, ඇතුළු ගම්මාන කිහිපයක පිට පිට නිවාස කිහිපයක් බිඳදමා ඇති අතර, නිවාස තුළ නිවැසියන්ගේ ආහාරයට තිබූ වී මලු, හාල්, ඇතුළු ආහාර ද්‍රව්‍ය පවා විනාශ කර ඇති බවයි.
මාදුරුඔය, සෝමාවතිය, වස්ගමුව යන ජාතික වනෝද්‍යානවලින් නිරන්තරයෙන්ම ගම්වදින වනඅලි රක්ෂිතවල සැඟව සිටිමින් රාත්‍රී කාලයේ ගම්වලට 
පැන ජීවිත හා දේපොළවලට දැඩි ලෙස හානි කරන බවද මහවැලි බී කලාපයේ ගොවි සංවිධාන නියෝජිතයන් සහ ගොවීහු ප්‍රකාශ කරති. රජය මඟින් ඉදිකරනු ලැබ තිබෙන බොහෝ අලි වැටවල් කඩාගෙන වනඅලි ගම් තුළට පැමිණීමත්, ඇතැම් විදුලි වැට අක්‍රිය තත්ත්වයේ පැවතීමත්, වනඅලි ගම් වැදීමට ප්‍රධාන හේතුවක් වී ඇති බවද ගොවීහු පෙන්වා දෙති. එමෙන්ම ජාතික වනෝද්‍යානවල සහ රක්ෂිතවල සිදුවන අපරාධයන්, විනාශයන් මෙන්ම දඩයම්කරුවන්ගේ ක්‍රියාකාරකම් හේතුවත් ඇතැම් මී ගවයන් සහ එළ ගවයන් ජාතික වනෝද්‍යානවල සැරිසරා අලින්ට තිබෙන ආහාර ගැනීමත්, ඒ හේතුවෙන් වනාන්තරවල ආහාර හිඟයක් ඇතිවීමත් වනඅලි ගම් වැදීමට ප්‍රධාන වශයෙන් බලපා ඇති බවද ඔවුහු කියා සිටිති.
මහවැලි බී කලාපයේ පවතින අලි මිනිස් ගැටුම පිළිබඳ අප එම කලාපයේ නේවාසික ව්‍යාපාර කළමනාකාර සුගත් වීරසිංහ මහතාගෙන් දුරකතනයෙන් කළ විමසීමකදී සඳහන් කළේ, මහවැලි බී කලාපය ආවරණය ඉදිකිරීමට අලි වැට 15ක් යෝජනා වී ඇති බවත්, ඉන් අලි වැට කිහිපයක් වැලිකන්ද, සිංහපුර, පැරකුම්යාය ගම්මාන ආවරණය වන පරිදි ඉදි කළ බවත්ය. ඉන් අලි ගම්වැදීම වළක්වා ගැනීමට හැකි වී තිබෙන බවද ඒ මහතා සඳහන් කළේය. කලාපයේ පවතින අලි මිනිස් ගැටුම් පිළිබඳව අප වැලිකන්ද, මනම්පිටිය, වෙහෙරගල, යන වනජීවී කාර්යාලවලින් දුරකතනයෙන් කළ විමසීමේදි ඔවුන් සඳහන් කළේ සාමාන්‍යයෙන් වනාන්තරවල පවතින ආහාර හිඟයත්, ඒ තුළ සිදුවන මිනිස් ක්‍රියාකාරකම් හේතුවෙනුත් කලාපයේ අලි මිනිස් ගැටුම වැඩි වී ඇති අතර, ඕනෑම අවස්ථාවකදි ගම්වදින වනඅලි පලවා හැරීමට අවශ්‍ය කටයුතු කර ඇති බවත්ය.
