අධික වර්ෂාවත් සමඟ තෙල්දෙණිය මැදදුම්බර මොරගහමුල ප්‍රදේශයේ නිවෙසක් මතට කඩාවැටුණු පස් කන්දකට යට වී 16 හැවිරිදි පාසල් සිසුවකු මියගොස් ඇති බව වාර්තා වෙයි.
සිද්ධිය ඊයේ (20) අලුයම 4.30ට පමණ සිදුව තිබෙන බව තෙල්දෙණිය පොලීසිය පවසයි. මියගොස් ඇත්තේ ඩබ්ලිව්.ඒ. ගයාන් නමැති සිසුවෙකි.
පස් කන්දට පහළින් වූ කාමරයක මෙම සිසුවා නිදා සිට ඇති අතර, ඊට යාබදව පිහිටි කාමරයක සිටි සිසුවාගේ සීයා සහ ආච්චිද තුවාල ලබා ප්‍රතිකාර 
සඳහා මැදමහනුවර රෝහලට ඇතුළත් කර තිබේ.
මහනුවර දිස්ත්‍රික්කයේ ප්‍රදේශ ගණනාවකට ඊයේ (20) දහවල් සිට අධික වැසි පතිත වූ අතර මැදදුම්බර මොරගහමුල ප්‍රදේශයට ඇදවැටුණු වැසි සමඟ අදාළ නිවෙසට ඉහළින් වූ පස් කන්ද නාය යෑමෙන් මෙම අනතුර සිදුව ඇත.
පස් කන්දට යට වූ දරුවා ප්‍රදේශවාසීන් එක්ව මහත් පරිශ්‍රමයක් දරා ගොඩගෙන රෝහල්ගතකර කිරීමට රැගෙන යන අවස්ථාවේ දී මියගොස් තිබෙන බව වාර්තා වේ. තෙල්දෙණිය පොලීසිය සිද්ධිය සම්බන්ධයෙන් පරීක්ෂණ පවත්වයි.
