විදේශ කටයුතු අමාත්‍යාංශයේ නව ලේකම් අරුණි රණරාජා මහත්මිය එම අමාත්‍යාංශයේ දී සිය ධුරයේ රාජකාරි කටයුතු ආරම්භ කර තිබේ.
ශ්‍රී ලංකා විදේශ සේවාවේ වසර 28ක අත්දැකීම් සහිත ඒ මහත්මිය කීර්තිමත් රාජ්‍ය තාන්ත්‍රික නිලධාරිනියක් වන අතර, ඇය නිල වශයෙන් රාජකාරි කටයුතු ආරම්භ කිරීමේ අවස්ථාවට විදේශ කටයුතු අමාත්‍යාංශයේ ජ්‍යෙෂ්ඨ නිලධාරීහු එක්ව සිටියහ.
ඒ මහත්මිය නෙදර්ලන්තයේ සහ පිලිපීනයේ ශ්‍රී ලංකා තානාපතිනිය වශයෙන් කටයුතු කර තිබෙන අතර, ශ්‍රී ලංකා දූත මණ්ඩලවල කිහිපයක සේවය කර තිබේ. ඊට අමතරව විදේශ අමාත්‍යාංශයේ විවිධ තනතුරු හොබවා ඇත. මේ අතර අරුණි රණරාජා මහත්මිය රසායනික අවි තහනම් කිරීමේ සංවිධානයේ (OPCW) ශ්‍රී ලංකා නිත්‍ය නියෝජිතවරිය ලෙස ද කටයුතු කර ඇත. විදේශ කටයුතු අමාත්‍යාංශයේ ලේකම්වරිය වශයෙන් පත්වීමට පෙර මේ වසරේ අප්‍රේල් මාසයේ සිට විදේශ කටයුතු අමාත්‍යාංශයේ අතිරේක ලේකම්වරියක් සහ ප්‍රොටෝකෝල අංශයේ ප්‍රධානියා ලෙස කටයුතු කළාය.
අරුණි රණරාජා මහත්මිය යුක්රේන රාජ්‍ය විශ්වවිද්‍යාලයෙන් ජාත්‍යන්තර සබඳතා පිළිබඳ ශාස්ත්‍රපති උපාධියක් ද, එම විශ්වවිද්‍යාලයේම ජාත්‍යන්තර සබඳතා පිළිබඳ උපාධියක් ද ලබා ඇත. ඇයට තම මව් භාෂාවට අමතරව ඉංග්‍රීසි සහ රුසියානු භාෂා චතුර ලෙස හැසිරවිය හැකි අතර ජපන් භාෂාව ද සම්බන්ධයෙන් ද මනා දැනුමක් තිබේ.
