මහනුවර කෙන්ගල්ල ප්‍රදේශයේ වාහන අංගණයක තිබී තෙල්දෙණිය පොලීසිය භාරයට ගත් කැබ් රථය මෙවර මහමැතිවරණයට ශ්‍රී ලංකා පොදු ජන පෙරමුණ යටතේ නුවරඑළිය දිස්ත්‍රික්කයට තරග කළ අපේක්ෂකයකු උකසට තබන ලද වාහනයක් බව පොලිස් පරීක්ෂණ මඟින් අනාවරණය වී තිබේ.
මහනුවර පදිංචි අදාළ ව්‍යාපාරිකයා මෙම කැබ් රථය රුපියල් ලක්ෂ 15කට උකස් කර එහි පොත් පත් පසුව භාරදෙන බවට ප්‍රකාශ කළ බව වාහන අලෙවි ස්ථානයේ කළමනාකාරවරයා පොලීසියට පවසා ඇත. වාහනය උකස් කර කාලයක් ගත වුවද ඔහු යළි මුදල් දීමට හෝ වාහනයේ ලිය කියවිලි භාර දීමට කටයුතු නොකිරීම හේතුවෙන් වාහන අංගණයේ කළමනාකාරවරයා තෙල්දෙණිය පොලීසියට පැමිණිල්ලක් කරමින් අදාළ වාහනය සැක සිහිත බව ප්‍රකාශ කර තිබේ. පොලීසිය භාරයට ගත් කැබ් රථයේ අංකය සම්බන්ධයෙන් මෝටර් රථ ලියාපදිංචි කිරීමේ දෙපාර්තමේන්තුවෙන් කළ විමසීමේ දී එය ව්‍යාජ එකක් බව තහවුරු වී ඇත. වසර කිහිපයකට පෙර තම පෞද්ගලික ගිනිඅවියෙන් වෙඩි තබාගෙන මියගිය ව්‍යාපාරිකයෙකුට අයත්ව තිබූ මෙම වාහන අංගණයේ උකසට ලබාගත් වාහන ගණනාවක් තිබෙන බවට පොලීසියට තොරතුරු ලැබී තිබේ.
වාහනය රස පරීක්ෂක වෙත යොමු කර වාර්තාවක් ලබාගැනීමට කටයුතු කරන බව පොලීසිය පවසයි.
තෙල්දෙණිය පොලීසියේ විවිධ පැමිණිලි අංශයේ ස්ථානාධිපති ප්‍රධාන පොලිස් පරීක්ෂක දිසානායක මහතාගේ මෙහෙයවීමෙන් පරීක්ෂණ පැවැත්වෙයි.
