2023 අංක 3 දරන මැතිවරණ වියදම් නියාමනය කිරීමේ පනතේ 06 වැනි වගන්තිය යටතේ වූ නියමය ප්‍රකාරව ආදායම් වියදම් වාර්තා භාර දීම ලබන දෙසැම්බර් මස 06 දා මධ්‍යම රාත්‍රී 12ට පෙර බාරදිය යතු බව මැතිවරණ කොමිසම නිවේදනය කරයි.
1981 අංක 1 දරන පාර්ලිමේන්තු මැතිවරණ පනතේ විධි විධාන ප්‍රකාරව පවත්වන ලද 2024 පාර්ලිමේන්තු මැතිවරණයේදී තරග කරනු ලැබූ සියලුම දේශපාලන පක්ෂ, ස්වාධීන කණ්ඩායම් සහ අපේක්ෂකයන් විසින් 2023 අංක 3 දරන මැතිවරණ වියදම් නියාමනය කිරීමේ පනතේ 06 වැනි වගන්තිය ප්‍රකාරව මැතිවරණ ප්‍රචාරක වියදම් ඇතුළත් ආදායම් හා වියදම් වාර්තාව මැතිවරණ ප්‍රතිඵල ප්‍රකාශයට පත්කර දින විසි එකක් (21) ඇතුළත එනම් 2024.12.06 දින මධ්‍යම රාත්‍රී 12.00ට පෙර තරග කරන ලද එක් එක් මැතිවරණ කොට්ඨාසයේ තේරීම්භාර නිලධාරී වෙත ද ආණ්ඩුක්‍රම ව්‍යවස්ථාවේ 99 අ ව්‍යවස්ථාව (ජාතික ලැයිස්තුව) අනුව නම් කරන ලද අපේක්ෂකයන් විසින් සිය ආදායම් වියදම් වාර්තා මැතිවරණ කොමිෂන් සභාවේ ප්‍රධාන කාර්යාලය වෙත ද භාර දිය යුතු බව කොමිසම නිවේදනයක් නිකුත් කරමින් පවසයි.
ඒ ඒ මැතිවරණ කොට්ඨාසවල වියදම් කළ හැකි උපරිම සීමා ශ්‍රී ලංකා ප්‍රජාතාන්ත්‍රික සමාජවාදී ජන රජයේ අංක 2406/03 හා 2024.10.15 දිනැති අති විශේෂ ගැසට් පත්‍රයේ පළකර ඇති බව එහි දක්වා ඇති අතර
මෙම වාර්තාවට, පක්ෂය/කණ්ඩායම් හා අපේක්ෂකයා වෙනුවෙන් පිළිගනු ලැබූ හෝ භාරගනු ලැබූ පරිත්‍යාග හෝ දායකත්ව සහ එම පරිත්‍යාග හෝ දායකත්ව ද්‍රව්‍යමය වශයෙන් ලැබුණේ නම් ඒවායේ ඇස්තමේන්තු වටිනාකම, එකී දායකත්ව පරිත්‍යාග කරනු ලැබුවේ ත්‍යාග, ණය මුදල්, අත්තිකාරම් හෝ තැන්පතු වශයෙන් ද යන වග සඳහන් කළ යුතු බවද දන්වා ඇත. මේ සඳහා ආදර්ශ ආකෘති පත්‍ර ඕනෑම දිස්ත්‍රික් මැතිවරණ කාර්යාලයකින් ලබාගත හැකි බව වැඩිදුරටත් දැනුම් දෙන අතර
අදාළ ආදායම් හා වියදම් වාර්තා 2024.12.17 වන දින සිට පුරවැසියන්ගේ දැනගැනීම පිණිස ඒ ඒ තේරීම්හාර නිලධාරී කාර්යාලවලදී හා රාජගිරියේ පිහිටි මැතිවරණ කොමිෂන් සභාවේ ප්‍රධාන කාර්යාලයේ දී ප්‍රදර්ශනය කරනු බවද එම නිවේදනයේ දක්වා ඇත.
සුභාෂිණී සේනානායක
