ශ්‍රී ලංකා යුද හමුදා අන්තර් රෙජිමේන්තු මුයිතායි පිරිමි තරගාවලියේ ශූරතාව දිනා ගැනීමට විජයබාහු පාබළ රෙජිමේන්තුව සමත් වූ අතර, අනුශූරතාව ගජබා රෙජිමේන්තුවට හිමි විය.
ශ්‍රී ලංකා යුද හමුදා විදුලි හා යාන්ත්‍රික ඉංජිනේරු බළකාය සහ ශ්‍රී ලංකා යුද හමුදා පොලිස් හේවා බළකාය සමව තෙවැනි ස්ථානයන් හිමිකර ගත්තේය.
ශ්‍රී ලංකා යුද හමුදාවේ මුයිතායි කමිටුව විසින් සංවිධාන කළ මේ තරගාවලිය පනාගොඩ යුද හමුදා බොක්සිං ගෘහස්ථ ක්‍රීඩාංගණයේ දී පැවැත්විණි. ශ්‍රී ලංකා යුද්ධ හමුදාවේ රෙජිමේන්තු 12කට අයත් ක්‍රීඩකයෝ 167 දෙනෙක් මේ සඳහා සහභාගි වූහ.
රන් පදක්කම් 8ක්, රිදී පදක්කම් 5ක් සහ ලෝකඩ පදක්කම් 6ක් දිනා ගනිමින් විජයබාහු පාබළ රෙජිමේන්තුව ශූරයන් බවට පත් වූයේ අඛණ්ඩව තුන්වැනි වරටය. රන් පදක්කම් 4ක් රිදී පදක්කම් 4ක් සහ ලෝකඩ පදක්කම් 8ක් අනුශූරතාව දිනා ගත් ගජබා රෙජිමේන්තුව දිනාගෙන තිබිණි.
ශ්‍රී ලංකා යුද හමුදා මුයිතායි කමිටුවේ සභාපති බ්‍රිගේඩියර් කේ.ඩී.එම්.එල්. සමරදිවාකර මහතාගේ ප්‍රධානත්වයෙන් කුසලාන හා සහතික ප්‍රදානය සිදු කෙරිණි.
