මාතලේ ලග්ගල එළවනාකන්ද ප්‍රදේශයේදී ඉකුත් 14 වෙනිදා රාත්‍රී බස් රථයක් සහ වෑන් රථයක් මුහුණට මුහුණ ගැටී සිදු වූ අනතුරෙන් තුවාල ලැබූ 15 දෙනකු විල්ගමුව සහ මහියංගණය රෝහල්වල තවදුරටත් ප්‍රතිකාර ලබමින් සිටින බව විල්ගමුව පොලීසිය සඳහන් කරයි.
මෙම අනතුරින් වෑන් රථයේ ගමන් ගත් පුද්ගලයකු තුවාල ලබා විල්ගමුව රෝහලට ඇතුළත් කිරීමෙන් අනතුරුව මියගොස් ඇති අතර බස් රථයේ ගමන් ගත් දෙදෙනකු ද මියගිය බව පොලීසිය කියයි.
මෙම මාරක අනතුරින් මියගොස් ඇත්තේ, වෑන් රථයේ ගමන් ගත් 44 වියැති අංක 2128 විල්ගමුව, හෙට්ටිපොළ ලිපිනයේ පදිංචිව සිටි පේරවත්තේ 
මෙගොඩ ගෙදර මහේෂ් ප්‍රියංකර ජයවර්ධන, කොළඹ බ්ලූමැන්ඩල් ඩී 02 /14 ලිපිනයේ පදිංචිව සිටි 31 හැවිරිදි රාමනාදන් ඇන්තනී රාජසේකර සහ ගම්පහ නාරම්වල අංක 219/08 ලිපිනයේ පදිංචිව සිටි 30 හැවිරිදි කොඩිතුවක්කු ආරච්චිලාගේ මදුනෙත් ගයාන් ප්‍රියදර්ශන යන අය බව විල්ගමුව පොලීසිය පවසයි. තුවාල ලැබූ සෙසු පිරිස කොළඹ කොටහේන ප්‍රදේශයේ සහ අවට ප්‍රදේශවල පදිංචිකරුවන් වන අතර මෙම පිරිස වස්ගමුව ජාතික වනෝද්‍යාන නරඹා ආපසු යමින් සිටියදි මෙම අනතුරට මුහුණ පා ඇති බවද පොලීසිය කියයි.
මෙම අනතුරට හේතුව බස් රථයේ රියැදුරුගේ අපරීක්ෂාකාරී සහ නොසැලිකිලිමත් රිය ධාවනය බවත්, සිද්ධියට සම්බන්ධ බස් රථයේ රියැදුරු අත්අඩංගුවට ගෙන අධිකරණ ක්‍රියාමාර්ග ගැනීමට කටයුතු කර ඇති බවත් විල්ගමුව පොලීසිය සඳහන් කරයි.
අනතුරෙන් පසු බස් රථය අඩි හතළිහක් පමණ ප්‍රපාතයට වැටීමත් සමඟ බස් රථයේ සිරවී සිටි තිදෙනෙකුගේ ජීවිත බේරාගැනීමට යුද හමුදාවට, මෙන්ම ප්‍රදේශවාසීන්ට පැය ගණනාවක් වෙහෙස මහන්සියක් වීමට සිදු වූ බවද පොලීසිය කියයි.
මෙම අනතුර සිදුවන විට බස් රථයේ විසි දෙනකු සහ වෑන් රථයේ පස්දෙනකු ගමන් කර ඇති බවට මූලික පරීක්ෂණවලින් තහවුරු වී තිබේ.
අනතුරින් තුවාල ලබා විල්ගමුව සහ මහියංගණ රෝහල්වල ප්‍රතිකාර ලබන අයගේ තත්ත්වය එතරම් බරපතළ නොවන බවත්, සුළු තුවාල ලබා සිටි කීපදෙනෙකු ප්‍රතිකාර ගෙන පිටව ගොස් ඇති බවද රෝහල් ප්‍රකාශයකයෙකු අප කළ විමසීමකදී සඳහන් කළේය.
මෙම අනතුර සම්බන්ධව වැඩිදුර පරීක්ෂණ කටයුතු විල්ගමුව පොලීසිය විසින් සිදු කරනු ලබයි.
