මැතිවරණය පැවති පෙරේදා (14) දිනයේ මැතිවරණ නීති උල්ලංඝනය කිරීම් ඇතුළු සිදුවීම් සම්බන්ධයෙන් පොලීසිය පුද්ගලයන් 60කට ආසන්න පිරිසක් අත්අඩංගුවට ගෙන තිබුණි.
කුරුණෑගල කාර්මික විද්‍යාලයේ පැවති ඡන්ද ගණන් කිරීමේ මධ්‍යස්ථානයේ ප්‍රධාන දොරටුවෙන් පොලිස් අණ නොතකමින් අනවසරයෙන් ජිප් රථ දෙකක් ගණන් කිරීමේ මධ්‍යස්ථානය වෙත පෙරේදා රාත්‍රී කාලයේ ඇතුළු වී තිබේ. ඒ සම්බන්ධයෙන් එක් ජීප් රථයක රියැදුරු ලෙස කටයුතු කළ දළදාගම නගරයේ පිහිටි හෝටලයක පදිංචි ලිපිනය ලෙස සඳහන් 25 හැවිරිදි පුද්ගලයකු අත්අඩංගුවට ගෙන ඇත.
දෙවැනි ජීප් රථයේ රියැදුරු ජීප් රථය දමා පලාගොස් ඇත. විමර්ශනයේදී හෙළිවී ඇත්තේ එම ජීප් රථය අතහැර පලාගිය පුද්ගලයා කුරුණෑගල දිස්ත්‍රික්කයේ ශ්‍රී ලංකා පොදුජන පෙරමුණේ අපේක්ෂකයකු වන දළදාගම පිහිටි අදාළ හෝටලයේ හිමිකරු බවයි.
කල්පිටිය පොලිස් බල ප්‍රදේශයේ මැතිවරණයට අදාළ සිදුවීම් දෙකක් වාර්තා වී ඇති අතර එයින් පළමු සිදුවීම වාර්තා වී ඇත්තේ එක්සත් ජාතික සංධානයේ පුත්තලම දිස්ත්‍රික් අපේක්ෂකයෙක් වන හයිදර් අලි මොහොමදු පර්සාන් මහතා ඡන්දය ලබාදීම වෙනුවෙන් මුදල් බෙදා දීමකි. මෙම අපේක්ෂකයාව පොලීසියට භාරදී ඇත්තේ ප්‍රදේශවාසීන් රඳවා ගැනීමෙන් අනතුරුවය. ඔහු සතුව ඒ වන විට රුපියල් 97,200ක මුදලක්ද තිබී ඇත. කල්පිටියේ මැතිවරණයට අදාළ දෙවැනි සිදුවීම වාර්තා වන්නේ සමගි ජන බලවේගය පක්ෂයේ අපේක්ෂකයකු සහල් බෙදා දීමකි. සහල් කිලෝ 05 බැගින් වූ කවර 17ක් ප්‍රදේශවාසීන් සොයාගෙන පොලීසියට භාරදී තිබේ.
කාතන්කුඩිය ඡන්ද ම්‍යස්ථානයක දී අවුරුදු 71ක් වයසැති කාන්තාවක් ඡන්ද මධ්‍යස්ථානයේ නිලධාරියකුගේ සහාය ඡන්දය සලකුණු කිරීමට ඉල්ලා ඇති අවස්ථාවේදී ඇය ඉල්ලා සිටි පක්ෂය නොවන පක්ෂයකට ඡන්දය සලකුණු කිරීමක් සම්බන්ධයෙන්ද පොලීසියට පැමිණිල්ලක් ලැබී ඇත. මේ සම්බන්ධයෙන් වහාම ක්‍රියාත්මක වූ මඩකලපුව තේරීම්භාර නිලධාරියා එම නිලධාරියාව ඉවත් කිරීමට කටයුතු කර ඇති අතර ඇයට අලුත් ඡන්ද පත්‍රිකාවක් ලබා දීමට ද පියවර ගෙන තිබේ.
වාද්දූව පොතුපිටිය පූජාරාමය විහාරස්ථානයේ පැවති ඡන්ද මධ්‍යස්ථානයේදී ඡන්ද දායකයකු ඔහු ඡන්දය සලකුණු කරන පක්ෂයේ යම් අපේක්ෂකයකුගේ මනාප අංකය මැතිවරණ රාජකාරියේ නිරතව සිටි කාර්ය මණ්ඩලයෙන් විමසා ඇති බව පොලීසිය සඳහන් කරයි. එය ලබාදීම කාර්ය මණ්ඩල නිලධාරීන් ප්‍රතික්ෂේප කිරීම හේතුවෙන් උරණ වූ එම ඡන්ද දායකයා ඡන්ද පත්‍රිකාව ඉරා දමා ඡන්ද මධ්‍යස්ථානයේ කළහාකාරී ලෙස හැසිරීම හේතුවෙන් අත්අඩංගුවට ගෙන ඇත.
බේරුවලද ඡන්දය පැවති දින සිදුවීම් දෙකක් වාර්තා වී තිබේ. පළමු සිදුවීම බේරුවල නලිම් හාජ්ජියාර් මුස්ලිම් බාලිකා විද්‍යාලයේ පැවති ඡන්ද මධ්‍යස්ථානයේදී සිදුව ඇත. එනම් ඡන්දය ප්‍රකාශ කිරීමට පැමිණ ඡන්ද පත්‍රිකාව ජංගම දුරකතනයකින් ඡායාරූප ගත කළ පුද්ගලයකු අත්අඩංගුවට ගැනීමකි. අත්අඩංගුවට ගෙන ඇත්තේ වයස අවුරුදු 35ක් වන පුද්ගලයෙක් බව පොලීසිය කියයි. බේරුවල එදිරිල්ලගොඩ අල් හසිනියා මහා විද්‍යාලයේ ඡන්ද මධ්‍යස්ථානයේදී ද ඡන්ද පත්‍රිකාව ඡායාරූපගත කළ පුද්ගලයකු අත්අඩංගුවට ගෙන ඇත. ඔහු අවුරුදු 22ක් වයසැති තරුණයෙකි.
නල්ලතන්නියේදී සහකාර තේරීම්භාර නිලධාරිවරයා ඡන්ද මධ්‍යස්ථාන පරීක්ෂාවට ගමන් කළ කැබ් රථයට බීමත් පිරිසක් විසින් පහරදීමක් ද වාර්තා වී ඇත. ඒ සම්බන්ධයෙන් සැකකරුවන් දෙදෙනෙක් අත්අඩංගුවට ගත් බව නල්ලතන්නිය පොලීසිය පවසයි. හැටන් පොල්පිටිය පොලිස් වසමේ මිනුවන්දෙනිය ඡන්ද මධ්‍යස්ථානයේදී වයස අවුරුදු 68ක කාන්තාවක් ඡන්දය ප්‍රකාශ කිරීමට ගොස් ඡන්ද මධ්‍යස්ථාන ස්ථානාධිපතිගෙන් ඡන්ද පත්‍රිකාව සලකුණු කිරීමට සහාය ඉල්ලා ඇත. එහිදී එම ඡන්ද මධ්‍යස්ථානාධිපති තමා ඉල්ලා සිටි පක්ෂය වෙනුවට වෙනත් පක්ෂයකට ඡන්දය සලකුණු කළ බවට එම කාන්තාව කෑ ගසා කලහකාරී ලෙස හැසිරෙමින් පොලීසියට පැමිණිලි කර තිබේ.
අක්මීමන හියාරේ මහා විද්‍යාලයේ පැවති ඡන්ද මධ්‍යස්ථානයට ඡන්දය ප්‍රකාශ කිරීමට පැමිණි පුද්ගලයකුගේ ජංගම දුරකතනයට ලද ඇමතුමකට අනුව ප්‍රතිචාර දැක්වීමට යන අවස්ථාවේදී ඡන්දපොළ ස්ථානාධිපති එයට ප්‍රතිචාර දැක්වීම මෙම අවස්ථාවේදී කළ නොහැකි බවට දැන්වීමේදී එම පුද්ගලයා ඔහු අත තිබූ ඡන්ද පත්‍රිකාව ඉරා දමා ඇත. ඒ සම්බන්ධයෙන් වයස අවුරුදු 47ක් වන හියාරේ පදිංචිකරුවෙක් අක්මීමන පොලීසිය අත්අඩංගුවට ගෙන තිබේ. මීටියාගොඩ බේරතුඩුව කනිෂ්ඨ විද්‍යාලයේ පැවති ඡන්ද මධ්‍යස්ථානයට ඡන්දය ප්‍රකාශ කිරීමට පැමිණි පුද්ගලයකු ඡන්ද පත්‍රිකාව සලකුණු නොකර ඉරා කලහාකාරී ලෙස හැසිරී තිබේ. වයස අවුරුදු 72ක් වන එම පුද්ගලයාව පොලීසියෙන් අත්අඩංගුවට ගෙන ඇත.
පොතුවිල් පසරව්චේන උප තැපැල් කර්යාලය මඟින් බෙදා දිය යුතු නිල ඡන්ද දැන්වීම් පත්‍රිකා 89ක් එම උප තැපැල් කාර්යාලයේ සේවය කරන උප තැපැල්කරුවකු නිසි ලෙස ඡන්ද පත්‍රිකා බෙදා නොදුන් බවට පවසමින් පැමිණිල්ලක් කර ඇති බව පොතුවිල් පොලීසිය සඳහන් කරයි. ඒ සම්බන්ධයෙන් අක්කරපත්තුව ප්‍රාදේශීය තැපැල් අධිකාරීවරයා විසින් විමර්ශනයක්ද ආරම්භකර ඇත.
මූතූර් අසාත් නගර් අල් ෆලාහ් ඡන්ද මධ්‍යස්ථානය අසලදී නව ප්‍රජාතන්ත්‍රවාදී පෙරමුණේ ගෑස් සිලින්ඩරය සහ අංක 03 සලකුණු කරන ලද ඡන්ද පත්‍රිකාවට සමාන ලෙස සකස් කරන ලද පත්‍රිකා ඡන්ද දායකන් වෙත බෙදා හරිමින් සිටි සැකකරුවකු ඔහු සතුව තිබූ පත්‍රිකා 125ක් සමඟ අත්අඩංගුවට ගෙන තිබේ.
