කොබෙයිගනේ පොලිස් වසමේ පන්නව මුස්ලිම් විද්‍යාලයේ ඡන්ද මධ්‍යස්ථානයේ මහ මැතිවරණයේ ඡන්ද විමසීමේ රාජකාරි සඳහා අනුයුක්ත කර සිටි නිලධාරියකු ඊයේ (14) උදෑසන හදිසියේම මරණයට පත්ව ඇති බව කුරුණෑගල දිස්ත්‍රික් මැතිවරණ ආරවුල් නිරාකරණ මධ්‍යස්ථානය පවසයි.
මාවතගම පරගහදෙණියේ පදිංචි එම්.එස්.එම්. අසීස් (58) නමැති නිලධාරියා මරණයට පත්ව ඇත. ඔහු පොල්ගහවෙල ගොවිජන සේවා මධ්‍යස්ථානයේ සේවයේ නියුතුව සිටි අයෙකි.
මැතිවරණ රාජකාරි ඇරැඹීමට පෙර ඔහු විදුහලේ වැසිකිළියට ගොස් මියගොස් සිටියදී අනෙක් නිලධාරීන්ට හමුව තිබේ. මෙම මරණය කිසියම් අසනීප තත්ත්වයක් මත සිදුව ඇති බවට සැකකරන අතර කොබෙයිගනේ පොලිසිය මඟින් වැඩිදුර පරීක්ෂණ කටයුතු සිදු කරනු ලබයි.
කෙසේ වුවද එම ඡන්ද මධ්‍යස්ථානයේ ඡන්ද විමසීමේ කටයුතු කුරුණෑගල දිස්ත්‍රික් තේරීම් භාර නිලධාරි ආර්.එම්.ආර්. රත්නායක මහතාගේ උපදෙස් අනුව සාමාන්‍ය පරිදි ආරම්භ කර ඇති බව මැතිවරණ ආරවුල් නිරාකරණ මධ්‍යස්ථානය පැවැසීය.
නිකවැරටිය මහේස්ත්‍රාත් අධිකරණයේ ‘ මහේස්ත්‍රාත් චාන්දන ලියනගේ මහතාගේ නියෝග අනුව, නිකවැරටිය මූලික රෝහලේදී මිය ගිය නිලධාරියාගේ සිරුර පිළිබඳව වූ පශ්චාත් මරණ පරීක්ෂණය සිදු කිරීමට නියමිතව තිබුණි.
නිකවැරටිය කොට්ඨාස භාර පොලිස් අධිකාරි වසන්ත ජයමිණ කුමාර මහතාගේ උපදෙස් අනුව සහකාර පොලිස් අධිකාරි ජයන්ත ගුණවර්ධන මහතාගේ අධීක්ෂණයෙන් ස්ථානාධිපති ප්‍රධාන පොලිස් පරීක්ෂක උදය කුමාර මහතාගේ මෙහෙයවීමෙන් නිලධාරීහු වැඩිදුර පරීක්ෂණ සිදුකරති.
කුරුණෑගල අතිරේක
පුෂ්පකුමාර ජයරත්න
නිකවැරටිය – ගයන්දි පමෝධා
පොල්පිතිගම
නන්දන කැලේගම
