විල්පත්තුව ජාතික වනෝද්‍යානය කෙළවරේ පිහිටි පූක්කුලම ධීවර ගම්මානයේ ඡන්ද රාජකාරි අවසන් කර නිලධාරීන් ඡන්ද පෙට්ටිද රැගෙන ඔවුන්ට ගමන් පහසුකම් සඳහා ලබා දී තිබූ සෆාරි ජීප් රථවල නැගී 14 රාත්‍රියේම ගණන් කිරීමේ මධ්‍යස්ථාන වෙත පැමිණි බව පුත්තලම දිස්ත්‍රික් ලේකම් එච්.එම්.එස්.පී. හේරත් මහතා පැවැසීය.
පූක්කුලම ඡන්ද මධ්‍යස්ථානය වනාතවිල්ලුව, එළුවන්කුලම, විල්පත්තුව ජාතික වන උද්‍යාන පිවිසුමේ සිට කිලෝමීටර් 41ක දුරකින් කුදිරමලේ තුඩුවට කිලෝමීටර් තුනක දුරකින් පිහිටා තිබේ.
විල්පත්තුව ජාතික වනෝද්‍යානයේ මැදට මහ වැසි ලැබීමත් සමඟ මාර්ගයේ පැවැති අපහසුතාවය හේතුවෙන් පූක්කුලමේ සිට එළුවන්කුලම පිවිසුමට පැමිණීමට ඡන්ද රාජකාරි සඳහා ගිය නිලධාරින්ට පැය තුනකට ආසන්න කාලයක් ගතවූ බව කියති.
මෙම ධීවර ගම්මානයේ පවුල් 60කට ආසන්න පිරිසක් පදිංචිව සිටින අතර එහි ඡන්ද 184ක් ඇති බව පුත්තලම තේරීම් භාර නිලධාරියා පවසයි.
අදාළ ධීවර ගම්මානයේ වාසය කරන ධීවරයන් වෙනුවෙන් ස්ථාපිත කළ ඡන්ද මධ්‍යස්ථාන සඳහා නිලධාරින් 15 දෙනකුගෙන් සමන්විතව තිබූ අතර, 14 දින උදෑසන සිට ඡන්ද විමසීම සිදුව බවත් ඉන් පසුව සවස 4ට ඡන්ද විමසීම අවසන් කිරීමේන් පසු ඡන්ද පෙට්ටිද රැගෙන නිලධාරීන් ආරක්ෂිතව පැමිණීම වනජීවී නිලධාරීන්ගේ අවශ්‍ය සහාය ලබාදීමට කටයුතු කළ බවත් විල්පත්තුව ජාතික වනෝද්‍යාන පාලක සුරංග පුබුදු රත්නායක මහතා පැවැසීය.
සෑම මැතිවරණයකදීම ඡන්ද පැවැත්වෙන අවස්ථාවලදී පූක්කුලම ඡන්ද මධ්‍යස්ථානය ස්ථාපිත කරන අතර එහි වෙසෙන ඡන්ද දායකයන්ගේ අයිතිය නිසි ලෙස ලබාදීමේ අරමුණින් කටයුතු කරති.
පුත්තලම ඇන්ඩෘ ජාතික පාසලේ සිට පූක්කුලමට ඡන්ද පෙට්ටි රැගෙන ආරක්ෂාවට පොලිස් නිලධාරීන්ද සමඟ 13 දින දහවල් නිලධාරීන් පිටත්ව යාම සිදුවූ අතර වනාතවිල්ලුව, එළුවන්කුලම, කලාඔය ආසන්නයට එම නිලධාරීන් ගමන් කළ වාහන පැමිණ එහි ක්‍රොස්වේ නාවික හමුදා කඳවුර ආසන්නයේදී ගාල්කර කලාඔය මැදින් වූ එල්ලෙන පාලම මතින් ඡන්ද පෙට්ටි රැගත් නිලධාරින් එළුවන්කුලම වනජීවී කාර්යාලයට පැමිණීමෙන් පසු එතැන් සිට සෆාරි ජීප් රථවලින් පූක්කුලමට ගමන් කිරීමට කටයුතු කර තිබුණි.
මෙම ඡන්ද මධ්‍යස්ථානයේ සහකාර තේරීම් භාර නිලධාරි ලෙස පුත්තලම සහකාර වනජීවී අධ්‍යක්ෂ එරන්ද ගමගේ මහතා අදාළ ස්ථානයේ රාජකාරි සඳහා යොදවා තිබුණි.
කෙසේ වෙතත් මාර්ග අපහසුතා මැද පූක්කුලමේ සිට එළුවන්කුලම වනජීවී පිවිසුමට සෆාරි ජීප් රථවලින් රැගෙන ආ ඡන්ද පෙට්ටි රාත්‍රියේම පුත්තලම ඡන්ද ගණන් කිරීමේ මධ්‍යස්ථාන වෙත ක්‍රොස්වේ පිවිසුමේ සිට බස් රථවලින් රැගෙන ඒම සිදුව තිබුණි.
පුත්තලම අතිරේක හිරාන් ප්‍රියංකර ජයසිංහ
