Saturday, April 5, 2025
Home » ගඟේ සැඩ පහර වැඩි වී දියනාමින් සිටි තරුණ කත මරු දකී

ගඟේ සැඩ පහර වැඩි වී දියනාමින් සිටි තරුණ කත මරු දකී

-සැමියා ඇතුළු සිවු දෙනකු බේරාගත්තේ ප්‍රදේශවාසීන්

by sachintha
November 15, 2024 1:38 am 0 comment

රත්නපුර, බටේවල ප්‍රදේශයේදී බඹරබොටුව ගඟේ දිය නාමින් සිටි තරුණ කාන්තාවක් සැඩ පහරට හසුව ගසාගෙන ගොස් ජීවිතක්ෂයට පත්ව ඇතැයි වේවැල්වත්ත පොලීසිය පවසයි.

මෙලෙස දියේ ගසාගෙන ගිය කාන්තාවගේ සැමියා සහ තවත් සිවු දෙනකු ප්‍රදේශවාසීන්ගේ උත්සාහයෙන් දිවි බේරාගෙන තිබූ බවද පොලීසිය කියයි.

මොවුන් දියනෑමට පැමිණි ත්‍රිරෝද රථයද ගඟේ ගසාගෙන ගොස් ඇතැයි පොලීසිය පවසයි.

මෙලෙස දියේ ගිලී මරුමුවට පත්වූයේ ලෙල්ලුපිටිය, බැරැන්ඩුව පදිංචි කසුනි නිවර්තනා (24) නමැත්තියයි.

මරණකාරිය සමඟ ඇගේ සැමියාත් ඔහුගේ මිතුරන් සිවු දෙනකු ඉකුත් 13 වැනිදා පස්වරුවේ රත්නපුර, බටේවල, බඹරකොටුව ගඟේ දියනෑම සඳහා ත්‍රිරෝද රථයෙන් ගොස් තිබූ අතර, හදිසියේම ගඟේ ජලය වැඩිවීමෙන් මෙම අනතුර සිදුව ඇතැයි ද පොලීසිය සඳහන් කරයි.

මෙම අවස්ථාවේදී දියනාමින් සිටි සය දෙනකු සැඩ පහරට හසුව ගසාගෙන යද්දී ගම්වාසීන් දැඩි උත්සාහයක් ගෙන පස්දෙනකුගේ ජීවිත බේරාගෙන ඇති නමුත්, 24 හැවිරිදි විවාහක කාන්තාව සැඩ පහරට හසුව ගසාගෙන ගොස් මරුමුවට පත්වූ බව පොලීසිය පවසයි.

මෙම පිරිස බේරාගෙන තිබුණේ අදාළ ප්‍රදේශයේ තේ වත්තක දලු නෙළා එමින් සිටි පිරිසක් බවද පොලීසිය සඳහන් කරයි.

වේවැල්වත්ත පොලීසිය වැඩිදුර පරීක්ෂණ සිදු කරන අතර, මියගිය තැනත්තියගේ හදිසි මරණ පරීක්ෂණය රත්නපුර ශික්ෂණ රෝහලේදී පැවත්වීමට නියමිතව තිබිණි.

කහවත්ත – ලසන්ත නිරෝෂණ පෙරේරා සහ රත්නපුර විශේෂ – එන්. පී. රාජදොරේ

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT