සම්බුද්ධ ශාසනයේ ඉදිරි පැවැත්ම උදෙසා කුල දරුවන් සසුන්ගත කිරීම තම පැවිදි දිවියේ එක් උතුම් ගුණාංගයක් සේ සලකමින් වසර ගණනාවක සිට කුල දරුවන් පැවිදි කිරීමේ මෙහෙවරක නිරතව සිටින පින්වත් යතිවරයාණන් වහන්සේ නමක් අපට මුණ ගැසුණේ කටුගස්තොට හල්ලොලුව ශ්‍රී සාරානාථ ධර්ම විද්‍යාපීඨ මහා පිරිවෙන් විහාරස්ථානයේදීය. පිරිවෙන් විහාරයේ විහාරාධිපති ධුරයත්, අමෙරිකාවේ පෙන්සිල්වේනියාවේ බෞද්ධ මධ්‍යස්ථානාධිපති ධුරයත් හොබවන උන්වහන්සේ නමින් ආචාර්ය සාරසියපත්තුවේ මංගල මහනාහිමිපාණන් වහන්සේය.
පිරිවෙන් විහාරස්ථානයේ පැවැති වාර්ෂික කඨින පිංකම මෙවර පවැත්වුණේ පසුගිය මස 18 වැනි දිනය. එදින මංගල මාහිමිපාණන් වහන්සේ විසින් කුල දරුවන් පස්දෙනකු පැවිදි කළ අතර, පඬිකාරමඩුව, ගලෙන්බිඳුනුවැව පදිංචි නවෝද නිම්හාර කුල දරුවා අනුරාධපුරේ අමිතසාර යන නමින්ද, ලෝඩන්වත්ත, මාදුරාගොඩ, යටවත්ත පදිංචිව සිටි තරිඳු ගම්ලත් කුල දරුවා මාතලේ අමිතනාග යන නමින්ද, 8 ඇළ, 8 කණුව, අඹගහපැලැස්ස, රන්දෙනිගල පදිංචිව සිටි රිෂිත හේෂාන් පීරිස් කුල දරුවා රන්දෙනිගල සුමේධ යන නමින්ද, ගොරක ඇළ දෙල්විට, රිදීගම පදිංචිව සිටි අමිල සඳරුවන් සේනාරත්න කුල දරුවා ගොරක ඇළේ අමිතබෝධි යන නමින්ද, නෙල්ලියගම, ඉපලෝගම පදිංචිව සිටි අධීෂ මෙත්සර කුල දරුවා කැකිරාවේ අමිතදේව යන නමින්ද මෙසේ පැවිදි බිමට පිවිසුණහ. එම කුල දරුවන් පස්දෙනා සමඟ උන්වහන්සේ විසින් පැවිදි කරනු ලැබූ කුල දරුවන් ගණන 512කි. ඉන් නොනැවතුණු උන්වහන්සේ තවත් කුල දරුවකු පැවිදි කරනු ලැබුවේ පෙරේදා (13) දිනයේදීය. එම කුල දරුවා අම්පාර වඩිනාගල ප්‍රදේශයේ පදිංචි අඩුආදායම්ලාභි පවුලක අයෙකි.
1975 වසරේ ජනවාරි මාසේ 29 වැනිදා උතුම් පැවිදි දිවියට පිවිසි මංගල මාහිමිපාණන් වහන්සේ වල් බිහිවී, ගරා වැටී තිබුණු හල්ලොලුව සුදම්මානන්ද විහාරස්ථානය වෙත පැමිණ එය ගොඩනංවා අද වන විට ස්වාමීන්වහන්සේ සියක් නමක් පමණ අධ්‍යාපනය හදාරන සාරානාථ ධර්ම විද්‍යාපීඨ මහා පිරිවෙන බවට එම විහාරස්ථානය පත් කර තිබේ. තමන් වහන්සේ විසින් සම්බුද්ධ ශාසනයට ඉටුකරනු ලබන මෙම නිහඬ සේවය පිළිබඳව උන්වහන්සේ මෙසේ පැවැසූහ.
Òමම පැවිදි වුණේ 1975 වසරේ ජනවාරි මාසේ 29 වැනිදා. ඉන් පස්සේ විහාරස්ථානය වැඩිදියුණු කරමින් අද මහා පිරි‍ෙවනක් බවට එය පත් කර තිබෙනවා. උසස් අධ්‍යාපනය අවසන් කළ මා ගුරු වෘත්තිය තෝරා ගත්තා. අවසන් වරට මම සේවය කළේ තෙල්දෙනිය අම්බාල විදුහලේ. පස්සේ මම ආරම්භ කළ පිරිවෙනේම පරිවේණාධිපති බවට පත්වුණා. දැන් අපේ පිරිවෙනේ පරිවේණාධිපති ධුරය හොබවන්නේ ශාස්ත්‍රපති හමංගොඩ සුමංගල ස්වාමීන්වහන්සේය. මම මේ වන විට ආචාර්ය උපාධියත් සම්පූර්ණ කරලා අවසන්. මම මුලින්ම කුල දරුවෙක් සසුන්ගත කළේ 1985 වසරේදී. එදා පටන් අද දක්වා මම කුල දරුවන් 513 දෙනකු සම්බුද්ධ ශාසනයට එකතු කළා. මම මේ කුලදරුවෝ පැවිදි කරන්න සොයා ගන්නේ බොහෝ වෙහෙස මහන්සි වෙලා. එසේ පැවිදි කරන පිරිස අතුරින් බහුතරයක් දෙනා ඈත පිටිසර ගම්මානවල වෙසෙන බොහෝම දුප්පත් පවුල්වල දරුවෝ. ඉතින් ඒ දරුවෝ අතුරින් විශාල පිරිසක් පැවිදි වෙලා පිරිවෙනේ අධ්‍යාපනය ලබලා විශ්වවිද්‍යාලවලට ගිහින් උපාධි ලබාගෙන තියෙනවා. බොහෝ දෙනෙක් ගුරු වෘත්තියේ නියැළී ඉන්නවා. මම ලංකාව පුරා විහාරස්ථාන 25ක් පමණ ඉදිකරලා තියෙනවා. එම විහාරස්ථානවල අද විහාරාධිපති ධුර හොබවන්නේ මම පැවිදි කළ ස්වාමීන්වහන්සේලා. පෙන්සිල්වේනියාවේ භාවනා මධ්‍යස්ථානයේ ඉන්නෙත් මගේ ගෝල නමක්. අද (15) දිනයේත් මම තවත් කුල දරුවෙක් පැවිදි කරනවා.Ó
කටුගස්තොට සමූහ – එස්.ජී. විජේරත්න
