පළමු එක්දින ගැටුමෙන් ශ්‍රී ලංකාවට ලකුණු 45ක ජයක්
දඹුලු ක්‍රීඩාංගණයේ සේවක මණ්ඩලයටත් ප්‍රසංශා
සිහින් සිරි පොද වර්ෂාව පතිතවී පැය තුනක පමණ කාලයක් අපතේ ගිය පළමු එක්දින තරගය රංගිරි දඹුලු ක්‍රීඩාංගණ සේවක මණ්ඩලය කඩි ගුලක් මෙන් ක්‍රියාත්මකවී ගොඩ දැමීම හේතුවෙන් ඕවර 27ක් තුළදී ලකුණු 221ක ඉලක්කයක් නවසීලන්ත පිලට ලැබුණද, ඔවුන් ලකුණු 175කට සීමා කළ ශ්‍රී ලංකා ක්‍රීඩකයෝ ලකුණු 45ක ජයක් අත්කර ගත්හ. ඒ සමඟ තරග 3කින් සමන්විත එක්දින තරගාවලිය 1-0ක් ලෙස ශ්‍රී ලංකාව පෙරමුණට පැමිණියේය.
කුසල් මෙන්ඩිස් හා අවිශ්ක ප්‍රනාන්දු යුගලයේ ගිනිකෙළි සංදර්ශනයෙන් අලංකාර වූ ශ්‍රී ලංකා ඉනිම ඕවර 49.2කදී කඩුලු 5ක් දැවී ලකුණු 324ක් වුවද, ඊයේ රාත්‍රි‍යේ ඇඳ හැලුණු වර්ෂාවෙන් පසු ඩක්වර්ත් – ලුවිස් පැමිණ ප්‍රතිවාදීන්ගේ ඉලක්කය වෙනස් කළහ. කෙසේ වුවද නවසීලන්ත ඉනිමේ ආරම්භය තරමක් දරුණු අතට හැරෙමින් තිබියදී මහීෂ් තීක්ෂණ ලකුණු 88දී හා 89දී ආරම්භක පිතිකරුවන් දෙදෙනාම පිටියෙන් ඉවත් කිරීමෙන් බලමුළු බිඳ වැටෙන්නට පටන් ගත්තේය.
විල් යංග් ලකුණු 48කට හා ටිම් රොබින්සන් ලකුණු 35කට දවාගත් තීක්ෂණගෙන් පසු නායක අසලංක ලකුණු 5ක් තුළදී ඊළඟ කඩුලු දෙකම දවා ගැනීමට සමත් විය. තීක්ෂණ ‘ෂෝට් මිඩ්විකට්’ සිට ඔහුගේ වම් පැත්තට පියඹා ගොස් දර්ශනීය උඩ පන්දුවක් ලබා ගෙන මාර්ක් චැප්මන් දවා ගැනීම තරගයේ හරවුම් ලක්ෂයක් වූවේය. එතැන් සිට නවසීලන්ත පිලට ගොඩ ඒමක් නොවිණි. එහෙත් මයිකල් බ්‍රේස්වෙල් සටන්කාමී ලෙස පන්දු 32කදී හතරේ පහර 5ක් එල්ල කොට නොදැවී ලකුණු 34ක් ලබා අවසන් මො‍හොත තෙක් සිටියේය.
කලකට පසු ශ්‍රී ලංකා ප්‍රේක්ෂක්යන්ගේ දෑස් ඉදිරිපිට දිග හැරුණු හොඳම ලකුණු සබඳතාව ගොඩනැඟූ කුසල් මෙන්ඩිස් හා අවිශ්ක ප්‍රනාන්දු යන දෙදෙනා දෙවැනි කඩුල්ලට පන්දු 215කදී ලකුණු 206ක් රැස් කිරීමෙන් ලකුණු පුවරුව වේගයෙන් ඉහළ ගියේය.
එක්දින ඉනිම 21කට පසු ශතකයක් වාර්තා කළ කුසල් තම එක්දින දිවියේ හොඳම ඉනිම වාර්තා කරමින් පන්දු 128කදී හයේ පහර 2ක් හා හතරේ පහර 17ක් සමඟ ලකුණු 143ක් ලැබූ අතර, මෙයට පෙර ඔහුගේ හොඳම එක්දින ඉනිම වී තිබුණේ පසුගිය වසරේ පැවති ලෝක කුසලාන ක්‍රිකට් තරගාවලියේදී පාකිස්තානයට එ‍රෙහිව හයිද්‍රාබාද්හිදී ලැබූ ලකුණු 122 වේ. රංගිරි දඹුලු ක්‍රීඩාංගණයේ පිතිකරුවකු රුස් කළ ඉහළම ලකුණු වාර්තාව ද කුසල් මෙන්ඩිස් සතු කර ගත්තේය. කුසල් හා අවිශ්ක වාර්තා කළේ ඔවුන්ගේ 4 වැනි එක්දින ශතක වූ අතර, අවිශ්ක පන්දු 115කදී හයේ පහර 2 හා හතරේ පහර 9ක් සමඟ ලකුණු 100ක් ලබාගත් සැනින්ම ක්‍රීඩාගාරයට ගියේය. කාසියේ වාසිය දිනාගත් ශ්‍රී ලංකා එක්දින නායක චරිත් අසලංක පැකිළීමකින් තොරව මුලින් පන්දුවට පහරදීමට තීරණය කළ අතර, එම තීන්දුව කෙතරම් සාර්ථක එකක් දැයි ඔහු විසින්ම පසක් කරමින් පන්දු 28කදී හයේ පහර 2 හා හතරේ පහර 3ක් සමඟ ඉක්මන් ලකුණු 40ක් වාර්තා කළේය. තවත් පන්දු 4ක් තිබියදී වර්ෂාව පතිතවීමෙන් ශ්‍රී ලංකා ඉනිම නිමා කිරීමට විනිසුරුවෝ තීරණය කළ අතර, එවිට ජනිත් ලියනගේ නොදැවී ලකුණු 12ක් ලබා සිටියේය. ආරම්භක පිතිකරු පැතුම් නිස්සංක ලකුණු 12ක් ලබාගත් අතර, සදීර සමරවික්‍රම යළිත් අසාර්ථකවී ලකුණු 5කට දැවී ගියේය.
තරගයේ පළමු පන්දුව යැවීමත් සමඟ වර්ෂාව පතිතවීමෙන් මිනිත්තු 39ක පමණ කාලයක් අපතේ ගියේය. නවසීලන්තයේ කඩුලු රකින ක්‍රීඩක මිචෙල් හේ, නේතන් ස්මිත් හා ටිම් රොබින්සන් යන කෝඩුකාරයෝ තිදෙනා ඊයේ එක්දින වරම් දිනා ගත්හ.
දෙරට අතර දෙවැනි එක්දින තරගය මේ 17 වැනිදා මහනුවර පල්ලේකැලේ ක්‍රීඩාංගණයේදී පැවැත්වේ.
