පාර්ලිමේන්තු මහමැතිවරණය වෙනුවෙන් ඕනෑම හදිසි අවස්ථාවකට යොමුවීම සඳහා අද (13) සිට (15) දක්වා කොළඹ ගිනි නිවීම් සේවා දෙපාර්තමේන්තුවේ සියලු සේවකයන්ගේ නිවාඩු අවලංගු කර ඇතැයි ප්‍රාදේශීය ගිනි නිවීම් නිලධාරී රෝහණ නිශාන්ත සේනානායක මහතා පැවසීය.
ඒ අනුව ගිනි නිවීම් සේවා දෙපාර්තමේන්තු මූලස්ථානය මෙන්ම, හෙට්ටියවත්ත, ගෑන්ඩ්පාස්, වැල්ලවත්ත, කොටුව හා මාදිවෙල යන උපසේවා 
ස්ථානවල සේවකයන් 300ක් පමණ දෙනාගේ නිවාඩු අවලංගු කර ඇත.
උපසේවා මධ්‍යස්ථානවලට අමතරව ප්‍රධාන ඡන්ද මධ්‍යස්ථාන ලෙස භාවිත කරන කොළඹ රාජකීය සහ ඩී.එස්. සේනානායක යන විද්‍යාල භූමිවල ගිනි නිවීම් රථ දෙකක්, ගිලන් රථ දෙකක් සූදානම් කර තබා ඇතැයි ද ඒ මහතා කීය. ඊට අමතරව ගිනි නිවීමේ රථ 50 කට ආසන්න සංඛ්‍යාවක් ජීවිත මුදා ගැනීමේ රථ 12ක් මෙන්ම ගිලන් රථ 5ක් ද ඕනෑම මොහොතක පිටත් කර හැරීම සඳහා සූදානම්ව තබා ඇතැයිද සේනානායක මහතා වැඩිදුරටත් පැවසීය.
