වැලිමඩ බෝගහකුඹුර සිට අළුගොල්ල හරහා ගුරුතලාව සීනිමලය ප්‍රදේශයේ මාර්ගයේ දෙපස පිහිටි රජයේ වන වගාවට අවිධිමත් ලෙස කැළි කසළ බැහැර කිරීම හේතුවෙන් පරිසර විනාශයක් සිදු වන බව ප්‍රදේශවාසීහු පවසති.
නැදුන්ගමුව, මාවිතිකුඹුර, ගුරුතලාව, බෝගහකුඹුර, අළුගොල්ල ආදී ප්‍රදේශවල ජනතාව දිනකට විශාල පිරිසක් ගමන් ගන්නා මෙම මාර්ගයේ දෙපසට කැළි කසළ බැහැර කිරීම හේතුවෙන් පරිසර සුන්දරත්වයට ද හානි සිදුව ඇති බව පෙන්වා දෙන ප්‍රදේශවාසීහු, නිවෙස්වලින් ඉවතලන කැළි කසළ මෙන්ම කැඩුණු වීදුරු, බෝතල් ආදිය ද ගොඩනැඟිලි ද්‍රව්‍යද මෙම රජයේ වන වගාවට ගෙනැවිත් දමා ඇති බව දැක ගත හැකිය. මේ හේතුවෙන් මෙම වන වගාව ආශ්‍රිතව සිටින සතුන්ගේ ද ජීවිතවලට දැඩි බලපෑමක් එල්ල වන බව ජනතාව පෙන්වා දෙති. ජනතාව බලධාරීන්ගෙන් ඉල්ලා සිටින්නේ මෙම ගැටලුවට වහාම විසඳුමක් ලබා දෙන ලෙසයි.
