වැලිගම ප්‍රදේශයේ පිහිටි දැවැන්ත අපනයන කර්මාන්ත ශාලාවක් සතු ලක්ෂ විස්සකට වැඩි වටිනාකමින් යුත් යන්ත්‍ර උපකරණ, අමතර කොටස් සොරකම් කළ පුද්ගලයන් දෙදෙනකු එම අමතර කොටස් සමඟ පෙරේදා (12) දින අත්අඩංගුවට ගත් බව මිදිගම පොලීසිය පැවසීය.
මෙම ආයතනයේ දේපොළ සොරකම් කිරීම් සම්බන්ධව පාලනාධිකාරිය විසින් අවස්ථා කිහිපයකදී පොලීසියට පැමිණිලි කොට තිබිණ. ඒ පිළිබඳව මිදිගම පොලීසියේ ස්ථානාධිපති අසෝක අබේවර්ධන මහතාගේ සෘජු අධීක්ෂණය යටතේ පරීක්ෂණ සිදු කෙරුණු අතර, ආසන්න සිද්ධියක් ලෙස පසුගිය ඔක්තෝබර් 2 වැනි දින මෙම ආයතනයේ භාණ්ඩ සොරකමක් පිළිබඳව පාලන අධිකාරිය පොලීසියට පැමිණිලි කළේය. සිදු කළ විමර්ශන මත යන්ත්‍ර සූත්‍ර සඳහා යොදා ගන්නා රුපියල් ලක්ෂ විස්සකට වැඩි වටිනාකමින් යුත් කිලෝග්‍රෑම් 26ක් බරැති පිත්තල බුෂ් හතරක් සමඟ සැකකරුවන් දෙදෙනකු 12 දින පොලිසිය අත්අඩංගුවට ගෙන තිබේ. අත්අඩංගුවට ගෙන ඇති සැකකරුවන් මිදිගම සහ බටවල ප්‍රදේශයේ පදිංචි 30,56 හැවිරිදි අය බව පොලිසිය කියයි.
මෙම සොරකම්වලට සම්බන්ධ තවත් සැකකරුවන් පස්දෙනකු හඳුනාගෙන ඇති අතර, ඔවුන් මේ වන විට ප්‍රදේශයෙන් පලා ගොස් ඇති බවත්, අත්අඩංගුවට ගැනීමට විශේෂ පොලිස් කණ්ඩායමක් යොදා ඇති බවත් පොලීසිය සඳහන් කළේය. සැකකරුවන් කොටවිල මහේස්ත්‍රාත් අධිකරණය වෙත ඉදිරිපත් කිරීමට නියමිතව තිබිණ.
