ආයතන 3කින් දුන් බලපත්‍රය ගන්න ආයතන 15කට යන්න වෙලා
බලපත්‍රයේ මිල මෙන් හය හත් ගුණයක වියදමකුත් දරන්න වෙයි
වර්තමානය වන විට රටේ පවතින ආර්ථික තත්ත්වය මත ජනතාව නව ඉදිකිරීම් සඳහා යොමු වන්නේ ඉතා අඩුවෙනි. මේ හේතුවෙන් වක්‍රාකාරයෙන් රැකියා අහිමිව යන පිරිස බහුතරයකි. ඊට හොඳම උදාහරණයක් වන්නේ ඉදිකිරීම්වලට අවශ්‍ය ගල් සපයන ගල්කොරි පවත්වාගෙන යන හිමිකරුවන් හා ඒවායේ සේවයේ යෙදී සිටින සිය ගණනක් වන කම්කරුවන්ය. ගල්කොරි පවත්වාගෙන යන්නවුන්ට මෙම මූලික ගැටලුවට අමතරව මේ වන විට තවත් විශාල ගැටලුවකට මුහුණපෑමට සිදුව තිබේ. ඒ, කළුගල් කොරියක් පවත්වාගෙන යෑම සඳහා වන බලපත්‍රය ලබා ගැනීමේදී මුහුණ පෑමට සිදුවන සංකීර්ණ ක්‍රියාවලියයි.
කළුගල් කොරියක් හා කළුගල් කඩන සී ශ්‍රේණියේ කර්මාන්තයක් පවත්වාගෙන යෑමට ආයතන තුනකින් බලපත්‍ර ලබා ගැනීම ප්‍රමාණවත් වේ. එනම් ප්‍රාදේශීය සභාව, භූ විද්‍යා හා පතල් කැණීම් කාර්යාංශය හා මධ්‍යම පරිසර අධිකාරියයි. නමුත් එම ආයතන තුනෙන් ලබා ගන්නා අයදුම් පත්‍රය අතට ගැනීමට නම් ගල්කොරි හිමිකරුවන්ට ආයතන පහළොවකින් වාර්තා ලබා ගැනීමට සිදු වෙයි. එපමණක් නොව, ඒ එක් එක් ආයතනවලින් ගල් කොරියේ පරීක්ෂණ සඳහා රජයේ වාහනයට ගාස්තුව හිමිකරු ගෙවිය යුතුය. මෙම ක්‍රියාදාමය අවසන් වන විට බලපත්‍රයක් සඳහා රුපියල් ලක්ෂ හතක, අටක පමණ වියදමක් දැරීමට ඔවුන්ට සිදු වෙයි. මේ හේතුවෙන් ඔවුන් පත්ව සිටින්නේ විශාල අපහසුතාවකටය. මාතලේ පිහිටා තිබෙන ගල්කොරි 124ක් අතරින් 34ක් පමණක් මෙම සංකීර්ණත්වය හමුවේත් මේ වන විටත් පවත්වාගෙන යයි. පවුල් දහසකට වැඩි ප්‍රමාණයක් මේ හේතුවෙන් රැකියා නැතිව අතරමංව සිටින බවත්, ඉතා අපහසුවෙන් හෝ මෙම ගල්කොරි පවත්වාගෙන යෑම සිදු කරගෙන යන බවත් මාතලේ කළුගල් කොරි හිමිකරුවන්ගේ සංගමයේ සභාපති කරුණාරත්න මහතා පවසයි.
ඔහු ඒ සම්බන්ධයෙන් අදහස් දක්වමින් මෙසේද පැවසීය.
Òකළුගල් කොරියක් හා ගල්වළක් පවත්වාගෙන යෑමට බලපත්‍රයක් ගැනීමට ඉල්ලීම් ලිපිය හා ප්‍රාදේශීය සභාව, භූවිද්‍යා හා පතල් කැණීම් කාර්යාංශය සහ මධ්‍යම පරිසර අධිකාරිය ප්‍රමාණවත් වුණත් අමතරව ප්‍රාදේශීය ලේකම්, පුරාවිද්‍යා දෙපාර්තමේන්තුව, ග්‍රාම නිලධාරී, ස්වභාවික සම්පත් මධ්‍යස්ථානය, ගොඩනැඟිලි පර්යේෂණ ආයතනය, මධ්‍යම පළාත් සභාව, නාගරික සංවර්ධන අධිකාරියේ ඇගැයීම් වාර්තාව, දිස්ත්‍රික් ලේකම් කාර්යාලය, පුපුරන ද්‍රව්‍ය (වෙඩි බෙහෙත් ) භාවිතයට අවසර ලබා ගැනීමේ ස්ථාන, මහජන සෞඛ්‍ය පරීක්ෂක හා පොලිසිය ඇතුළු ස්ථාන කිහිපයකට එකින් එකට මාස හයක් තිස්සේ යා යුතුයි.
එසේ වුවත් එය ලබා දීමේ නිශ්චිත දිනයක් නියම නොකිරීම නිසා කර්මාන්තකරුවන් දැඩි කලකිරීමකට පත්ව තිබෙනවා. රටට උපයන ඩොලරය මේ විදිහට බාල්දු කිරීම නිසා මේ ගල්කොරි වැසී යන තත්ත්වයට දැන් පත්ව තිබෙනවා. කළුගල් කොරියක් කියන්නේ විශාල ආදායමක් ඉපයිය හැකි තැනක්. මුලදි ගල්වළක් පවත්වාගෙන යන බලපත්‍රයකට රුපියල් 24,000යි ගියේ. දැන් රුපියල් 154,000ක් පමණ ගෙවිය යුතුයි. ඊට අමතරවයි වාහනවලට ගෙවන්නේ. අද රජයේ කොන්ත්‍රාත්කරුවනුත් අසරණ තත්ත්වයට පත්ව තිබීම නිසා කර්මාන්තයට විශාල පාඩුවක් වෙලා තියෙන්නේ. කම්කරුවන් 10, 15 වැඩ කළ ස්ථාන මේ වන විට සේවකයන් දෙන්නට සීමා වෙලා. මාතලේ ගල්කොරිවලට ත්‍රිකුණාමලේ හොල්සිම් සිමෙන්ති කර්මාන්ත ශාලාවට ඩොලමයිට් කළුගල් සැපයීමේ හැකියාව කලින් තිබුණා. ඒත් මඩවල ප්‍රදේශයේත් කර්මාන්ත ශාලාවක් පවත්වාගෙන යෑම නිසා මාතලේ කර්මාන්තකරුවන් අන්ත අසරණ තත්ත්වයට පත්ව තිබෙනවා. වැඩ නැතිව කෝටි ගාණක් වටින වාහන, යන්ත්‍රෝපකරණ දිරාපත් වෙලා ගිහින්.Ó
කම්කරුවකු වන ගුණරත්න රණතුංග (67) මහතා මෙසේ අදහස් දැක්වීය.
Òමම වැඩ කරන ගල්වළේ 20ක් විතර වැඩ කළා. දැන් අපි දෙන්නයි ඉන්නේ. මම දවසටම රුපියල් දාහක විතර මුදලක් හොයා ගන්නේ ගල් කඩලා. අසනීපයෙන් ඉන්නේ. එක අතයි වැඩ කරන්නේ. මේවා කාටවත් කියලා වැඩක් නැහැ, කර්මාන්ත දියුණු කළොත් අපටත් වැඩ තියෙනවා.Ó
කම්කරුවකු වන එච්.ජී. ප්රියන්ත විජිත කුමාර මහතා කියා සිටියේ, Òරත්තොට ගල්වළේ වැඩට ආවේ විල්ගමුවේ ඉඳලා. මම මෙතැන මුල ඉඳලම වැඩ කළා. තියෙන විදිහට වැඩ කරලා පොඩි මුදලක් හොයා ගන්නවා. මේ රස්සාවෙන් තුන් දෙනෙක් ජීවත් වෙනවා. ළමයෙක් පාසල් යනවා. වියදම් දරන්නේ කොහොමද කියන ප්‍රශ්නය තියෙනවා.Ó යැයි කියාය. රියැදුරු මහතකු කියා සිටියේ, වෙනදා දවසට ගල් ලෝඩ් හතක් අටක් රැගෙන ගියද මේ වන විට රැගෙන යන එකම ගල් ලෝඩ් එකත් ණයට ගෙන යන බවයි.
