ගොඩකවෙල නගරය ආසන්නයෙන් ගලා බසින දොඹකොළ ඇළ හරහා යොදා ඇති අබලන් ලෑලි පාලමෙන් එගොඩවීමට ගිය විසිහත් හැවිරිදි විවාහක තරුණයකු පෙරේදා (12) එම ඇළට වැටී සැඩ පහරට හසු වී මරුමුවට පත් වී ඇතැයි ගොඩකවෙල පොලීසිය පවසයි. මෙසේ මියගොස් ඇත්තේ ගොඩකවෙල, මල්වත්ත ලිපිනයේ පදිංචිව සිටි පෞද්ගලික බැංකු සේවකයකු වූ ඩී. ඒ. නදීක නුවන් තිලකරත්න නමැති විවාහකයෙකි.
මියගිය ඩී.ඒ. නදික නුවන් තිලකරත්න
මරණකරුගේ සිරුර ගොඩකවෙල මහින්ද මහා පිරිවෙන අසලින් ගලායන ඇළේ ලඳු පඳුරු අතරේ රැඳී තිබියදී ගොඩකවෙල පොලිසියේ නිලධාරීන් සහ ප්‍රදේශවාසීන් එක්ව ඊයේ (13) උදෑසන ගොඩගෙන ගොඩකවෙල ප්‍රාදේශීය රෝහලට භාරදී තිබිණී. පොලිසිය පවසන පරිදි පෙරේදා (12) රාත්‍රියේ මියගිය තරුණයා ගොඩකවෙල නගරයට පැමිණ ආපසු නිවෙස බලා රාත්‍රී 8.30 ට පමණ පාලම මතින් ගමන් කරමින් සිටියදී මෙම අනතුරට පත් වී ඇත. එම අවස්ථාවේ පැවැති අධික වර්ෂාව හේතුවෙන් දොඹකොළ ඇල්ල දෙගොඩ තලා ගලමින් පැවති මොහොතේ ඇළ හරහා තිබූ අනතුරුදායක අබලන් පාලමෙන් මිය ගිය පුද්ගලයා එගොඩවීමට යෑමේදී එක්වරම ඔහු ඇළට වැටී සැඩ පහරට හසුව ගසාගෙන ගොස් ඇති බවට අනාවරණය වී ඇතැයි ද පොලිසිය පැවසීය. එම අවස්ථාවේ සිද්ධිය දුටු තරුණයන් පිරිසක් මියගිය තරුණයා බේරා ගැනීමට උත්සාහ ගත්ත ද අලුයම දක්වා තරුණයා සොයා ගැනීමට නොහැකි වී ඇත. ඇළට වැටුණු තරුණයා බේරා ගැනීමට උත්සාහ කිරීමේ දී වෙනත් තරුණයකුගේ කකුල සර්පයකු දෂ්ට කර ඇති අතර ඔහුගේ තත්ත්වය බරපතළ වූ නිසා ප්‍රතිකාර සඳහා කහවත්ත මූලික රෝහලට ඇතුළත් කර කිරීමට පියවර ගෙන ඇත. ගොඩකවෙල ප්‍රාදේශීය රෝහලේ තැන්පත් කර තිබූ මියගිය තරුණයාගේ මෘත දේහය පශ්චාත් මරණ පරීක්ෂණය සිදුකිරීම සඳහා බළන්ගොඩ මූලික රෝහලට යොමු කර ඇති බව ද පොලිසිය පැවසීය. මරණය සම්බන්ධයෙන් ගොඩකවෙල පොලිසිය වැඩිදුර පරීක්ෂණ පවත්වයි.
