කුමට ද ගුණ සැරසිලි වැඩක් නැති
වැඩියම වුණොත් පොඩි සුදු කොඩි දෙකක් ඇතී
මැරුණට පස්සේ කිසි කෙනකුට බරක් නැති
මිනිසා මළා කීවොත්නං ඒත් ඇති
තමන්ගේ මරණයේදී පාංශුකූල දීමේ අවස්ථාවේදී හොඳ නරක ගැන ගුණකථන නොකර මට්ටකුණ්ඩලී කථාව, නකුල සිටු කථාව කියන්නැයි සඳහන් 
කරමින් සිය අවසන් කැමැත්ත ලියා තැබූ පුද්ගලයකුගේ මරණයක් සම්බන්ධයෙන් මැවනැල්ල, හෙම්මාතගම, ගල්කොන ප්‍රදේශයෙන් වාර්තා වෙයි.
මාවනැල්ල, හෙම්මාතගම, ගල්කොන ගමේ පදිංචිව සිට මිය ගිය ඩී.ආර්. කිරිබණ්ඩා මහතා මෙහි කතා නායකයා වන අතර ඔහු සිය මරණයෙන් සමාජයට ආදර්ශයක් ලබා දී ඇත්තේ සිය අවසන් කැමැත්ත මඟිනි.
දේශීය වෛද්‍යවරයෙක් මෙන්ම ගොවියකු වූ ඒ මහතා සිව් දරු පියෙකි. වයස අවුරුදු 88යි මාස 9ක් මේ ගම්මානයේ ජීවත් වූයේ සිය පරම්පරාවෙන් පැමිණි වෙදකමද සිදු කරමිනි.
ඔහු පසුගිය 9 වැනිදා සිය ජීවිත ගමන අවසන් කර ඇති අතර ඔහුගේ දේහය පිළිබඳ අවසන් කටයුතු කළ යුතු අයුරු 2018 වසරේ නොවැම්බර් 16 වැනිදා සිය පුතණුවන්ගේ බිරිය වන පාසල් ගුරුවරියක ඉදිරියේ පොතක ලියා තබා ඇත.
ඩී.ආර්. කිරිබණ්ඩා වෙද මහතාගේ අවසාන කැමැති පත්‍රය මෙසේය.
- මාගේ අවසාන කටයුතු පැය 24ක් තුළ (ඊටත් ඉස්සර හැකි නම්) කරන්න. එම්බාම් කරන්න එපා. පෙට්ටිය ඉතා සරල විය යුතු අතර වියන් තට්ටු, ලයිට් බුබුළු එපා. ඇඟට සුදු රෙද්දක් දමන්න. පොස්ටර්, බැනර්, සැරසිලි එපා. පාංශු කූලයට එක හාමුදුරුනමක් වුවද ප්‍රමාණවත්ය. පාංශුකූලයට සුදු රෙදි වෙනුවට හැකි නම් අදන සිවුරු පූජා කරන්න. හාමුදුරුවන්ට පූජා භාණ්ඩ පූජා කිරීමට
( රු.1000 ) ගානේ නෑදෑයන්ට (ලොකු දුව, ගංගා, මධු ඇතුළු) අන් නෑදෑයන්ට කියන්න. අවසන් කටයුතු වේලාවේ දි හොඳ නරක ගැන කතා නොකරන්න. පාංශු කූල අවස්ථාවේදී මට්ටකුණ්ඩලී කථාව, නකුල සිටු කථාව කියන්න. සමිතිවලින් බඩු බාහිරාදිය ගේන්න එපා. ඒවාගෙන් ලබා දෙන මුදල් ගන්නත් එපා. පියාට වදින විට කියන ගථාව කියා වඳින්න. කිසිවෙක් මා වෙනුවෙන් කඳුළු නොසලන්න. අනිත්‍ය මෙනෙහි කරන්න යනුවෙන් මෙසේ ලියා තිබුණි.
මිය යන්නට දිනකට පෙර තම දෙවැනි පුතාගේ නිවෙසට ගොස් සිටියදී ක්ලාන්තය වැනි තත්ත්වයක් ඇති බව පුතණුවන්ට පැවසීම නිසා හනිකට රෝහල්ගත කර පසු සිය දරුවන් සියලු දෙනා පැමිණ ඔවුන් සමඟ කතා බහ කර සවස මෙලොව හැර දා යන්නට විය. තම පියාගේ අවසන් කටයුතු පියා කියා ඇති අන්දමට සිදු කිරීමට දරුවන් සියලු දෙනා කටයුතු කරන්නට වූහ.
