සංචාරකයන්ට තම ආරක්ෂාව ගැන ඉල්ලීම් ඉදිරිපත් කිරීමේ මධ්‍යස්ථානය ලෙස පිහිටුවා ඇති පොලිස් වෙරළබඩ සහ සංචාරක කොට්ඨාසයේ ප්‍රධානියා වන නියෝජ්‍ය පොලිස්පති දමයන්ත විජය ශ්‍රී මහතාට එම අංකය හඳුන්වා දුන්දා සිට මේ දක්වා සංචාරක ආරක්ෂාව සම්බන්ධ ඉල්ලීම් 400ක් පමණ ලැබුණු බව ඒ මහතා ප්‍රකාශ කළේය.ආරක්ෂාව සම්බන්ධ වැඩියෙන්ම ඉල්ලීම් ලැබුණේ අමෙරිකානු සහ ඊශ්‍රායල තානාපති කාර්යාලවලින්, සංචාරක මඟපෙන්වන්නන්ගෙන් සහ සංචාරක ඒජන්සි, සංචාරක නවාතැන්පොළ, සංචාරකයන් තවත් තැනක සිට තවත් තැනකට ගමන් කරන අවස්ථාවලදී සහ එතෙර සිට සංචාරකයන් මෙරටට පැමිණෙන අවස්ථාවලදී බව නියෝජ්‍ය පොලිස්පති දමයන්ත විජය ශ්‍රී මහතා දිනමිණට පැවසීය.ඒ සෑම අවස්ථාවකදීම ඔවුන් ඉල්ලූ පරිදි ආරක්ෂාව නිසි පරිදි ලබාදීමට කටයුතු කරමින් සංචාරකයන්ට උපරිම ආරක්ෂාවක් ලබාදීමට කටයුතු කළ බව ද නියෝජ්‍ය පොලිස්පතිවරයා කියා සිටියේය.
ඊශ්‍රායල සංචාරකයන් සහ අනෙකුත් සංචාරකයන් ඉලක්ක කර ගනිමින් ත්‍රස්ත ප්‍රහාරයක් එල්ල වීමේ තර්ජනයක් ගැන ප්‍රකාශ වීමෙන් පසු ශ්‍රී ලංකාවේ අමෙරිකා එක්සත් ජනපද තානාපති කාර්යාලය සහ ඊශ්‍රායලය ආරුගම්බේ සහ තවත් ඇතැම් මුහුදු වෙරළ ආශ්‍රිත ප්‍රදේශවලට යන තම පුරවැසියන්ට අනතුරු ඇඟවීම් නිකුත් කර තිබිණි.
ඒ අනුව සංචාරකයන්ට නිසි ආරක්ෂාව ලබාදීම සඳහාත් ඔවුන්ගේ ආරක්ෂාව සම්බන්ධයෙන් පොලිසියෙන් ඉල්ලා සිටීමට විශේෂ දුරකතන අංකයක් ලබාදීමට වැඩබලන පොලිස්පතිවරයා පියවර ගෙන තිබුණි.ඒ අනුව වැඩබලන පොලිස්පතිවරයාගේ උපදෙස් පරිදි ඇමැති ආරක්ෂක ඒකකයේ නිලධාරීන් 150ක් සහ අනෙකුත් පොලිස් නිලධාරීන් අවශ්‍ය පරිදි ලබා ගන්නා ලෙස නියෝජ්‍ය පොලිස්පති දමයන්ත විජය ශ්‍රී මහතාට උපදෙස් දුන් බව හෙතෙම කියා සිටියේය.
ඒ අනුව සංචාරකයන් නිරන්තරයෙන් ගැවසෙන ස්ථාන සඳහා බුද්ධි අංශ නිලධාරීන් මෙන්ම සාමාන්‍ය රාජකාරි කරන පොලිස් නිලධාරීන් යොදවා තිබූ අතර වැඩි ආරක්ෂාවක් අවශ්‍ය අවස්ථාවලදී අතිරේක පොලිස් නිලධාරීන් යෙදවීමට ද තමා පියවර ගත් බව නියෝජ්‍ය පොලිස්පතිවරයා පැවසීය.
සංචාරකයන් නිරන්තර ගැවසෙන ස්ථානවලට මාර්ගබාධක යෙදවීමටත් ඇතැම් සංචාරකයන්ට අනාරක්ෂිත බව හැඟුණු අවස්ථාවලදී ඔවුන් සමඟ ගමන් කිරීමට පොලිස් නිලධාරීන් යෙදවීමටත්, සංචාරකයන්ගේ විශේෂ උත්සව අවස්ථාවලදී විශේෂ ආරක්ෂාවක් මෙන්ම බුද්ධි නිලධාරීන් ද යෙදවීමට කටයුතු කළ බව ද නියෝජ්‍ය පොලිස්පතිවරයා කියා සිටියේය.
ආරක්ෂාව ඉදිරියටත් එලෙසින්ම ලබාදෙන බව ද, නමුත් මේ වනවිට සංචාරකයන්ගේ ආරක්ෂාව සම්බන්ධයෙන් ගැටලුවක් ඇති නොවෙතැයි හැඟෙන බව ද කියා සිටි නියෝජ්‍ය පොලිස්පතිවරයා මෙරටට ප්‍රධානම විදේශ විනිමය ගලා එන සංචාරකයන් නිරන්තරයෙන් ආරක්ෂා කරන බව ද වැඩිදුරටත් නියෝජ්‍ය පොලිස්පතිවරයා කියා සිටියේය.
