රජයට අය විය යුතු රුපියල් බිලියන ගණනක බදු ගෙවීම පැහැර හැර ඇති බව කියන ඩබ්ලිව්.එම්. මෙන්ඩිස් සමාගම ඇතුළු මහා පරිමාණ මත්පැන් නිෂ්පාදන සමාගම් 5ක්, මෙම මස 30 වැනි දිනට පෙර අදාළ බදු මුදල් ගෙවීම නොකරන්නේ නම් එම සමාගම්වල බලපත්‍ර අත්හිටුවන බවට සුරාබදු කොමසාරිස් ජනරාල්වරයා සහ නීතිපතිවරයා ශ්‍රේෂ්ඨාධිකරණයට ඊයේ (13) දන්වා සිටියහ.
බදු ගෙවීම් පැහැරහැර ඇති මත්පැන් නිෂ්පාදන සමාගම් දහයක බලපත්‍ර වහාම ක්‍රියාත්මක වන පරිදි අත්හිටුවන ලෙස ඉල්ලා ගොනු කළ මූලික අයිතිවාසිකම් පෙත්සමක් කැඳවූ අවස්ථාවේදී සුරාබදු කොමසාරිස් ජනරාල්වරයා සහ නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් නෙරින් පුල්ලේ මහතා මේ බව දන්වා සිටියේය.
ප්‍රීති පද්මන් සූරසේන, යසන්ත කෝදාගොඩ සහ ප්‍රියන්ත ප්‍රනාන්දු යන මහත්වරුන්ගෙන් සමන්විත ශ්‍රේෂ්ඨාධිකරණ විනිසුරු මඬුල්ලක් හමුවේ මෙම පෙත්සම් කැඳවනු ලැබිණි.
එහිදී අධිකරණය හමුවේ පෙනී සිටි අතිරේක සොලිසිටර් ජනරාල්වරයා මේ බව දන්වා සිටියේය.
අදාළ කරුණු සලකා බැලීම සඳහා මෙම පෙත්සම් ජනවාරි 22 වැනි දින යළි කැඳවන ලෙස ද අධිකරණය එහිදී නියෝග කළේය.
එම්.එම්. සංජය මහවත්ත, සුසන්ද රංජිත් ලියනාරච්චි ඇතුළු 17 දෙනකු විසින් නීතිඥ මංජුල බාලසූරිය මහතා මඟින් මෙම පෙත්සම ගොනුකර තිබිණි.
සුරාබදු කොමසාරිස් ජනරාල් එම්.ජේ. ගුණසිරි, මුදල් අමාත්‍යාංශ ලේකම්වරයා, ඩබ්ලිව්.එම්. මෙන්ඩිස් සහ සමාගම, රෝයල් ඩිස්ටිලරීස් පෞද්ගලික සමාගම ඇතුළු මත්පැන් නිෂ්පාදන සමාගම් පහක් ඇතුළු පිරිසක් මෙහි වගඋත්තරකරුවෝ වෙති.
රජයේ ආදායමෙන් වැඩි කොටසක් බදුවලින් අය කර ගැනීමට රජය සෑම විටම අපේක්ෂා කරන බව පෙත්සම්කරුවෝ කියති.
මත්පැන් නිෂ්පාදන සමාගම් සඳහා වාර්ෂික බලපත් ලබාදෙන අතර ඔවුන් සුරාබදු ගෙවීමට බැඳී සිටින බව ද එමඟින් පෙන්වා දී තිබේ.
වගඋත්තරකාර මත්පැන් නිෂ්පාදන සමාගම් වාර්ෂිකව ගෙවිය යුතු බදු ගෙවීම වසර කිහිපයක සිට පැහැරහැර ඇති අතර එලෙස රජයට අය විය යුතු මුදල රුපියල් බිලියන 6කට ආසන්න බව එහි සඳහන් වේ.
ඒ බව දැන දැනම ඔවුන්ට නව බලපත්‍ර ලබා දීමට සහ ලබා දී ඇති බලපත්‍ර අලුත් කිරීමට සුරාබදු කොමසාරිස්වරයා ඇතුළු ඔහුගේ නිලධාරීන් කටයුතු කර ඇති බවට පෙත්සම්කරුවෝ චෝදනා කර සිටිති.
එබැවින් එම සමාගම්වලින් අය විය යුතු බදු මුදල් වහාම අය කර ගැනීම සඳහා සුරාබදු කොමසාරිස් ජනරාල්වරයා ඇතුළු ඔහුගේ නිලධාරීන්ට නියෝගයක් ලබා දෙන ලෙස මෙම පෙත්සම මඟින් ඉල්ලා ඇත.
එසේම මෙතෙක් බදු ගෙවීම පැහැරහැර ඇති මත්පැන් නිෂ්පාදන සමාගම් සහ එම සමාගම් ගෙවිය යුතු සම්පූර්ණ බදු මුදල පිළිබඳ තොරතුරු ඇතුළත් වාර්තාවක් අධිකරණයට ඉදිරිපත් කරන ලෙස සුරාබදු කොමසාරිස් ජනරාල්වරයාට නියෝග කරන ලෙස ද මෙම පෙත්සම මඟින් ඉල්ලා ඇත.
වගඋත්තරකාර සමාගම වෙනුවෙන් ජනාධිපති නීතිඥ රසික් සරුක් මහතා පෙනී සිටියේය.
නීතිපති වෙනුවෙන් අතිරේක සොලිසිටර් ජනරාල් නෙරින් පුල්ලේ මහතා පෙනී සිටියේය.
