පොලිස් නිලධාරීන් ලෙස පෙනී සිටි පිරිසක් ජීප් රථයකින් පැහැරගෙන යමින් සිටි සිය පුත්‍රයා බේරා ගැනීමට උත්සාහ දැරූ පියකු එම ජීප් රථයටම යටකර මරා දැමීමත්, එම තරුණයාට ඇසිඩ් ගසා බරපතළ තුවාල සිදු කිරීමට අදාළ ප්‍රධාන මොළකරු ඇතුළු සැකකරුවන් සිවු දෙනෙකු ඇහැළියගොඩ පොලිසිය පෙරේදා (12) අත්අඩංගුවට ගෙන තිබේ.
පසුගිය ඔක්තෝම්බර් 19 වැනි දින සිදුකර ඇති මෙම අපරාධයට හේතුව පෞද්ගලික ආරවුලක් බවත් එම තරුණයා පැහැර ගත් ජීප් රථය සහ ඊට පැමිණි පුද්ගලයන් පස් දෙනකු පිළිබඳ තොරතුරු අනාවරණය වී ඇති බවත් ඇහැළියගොඩ පොලිස් ස්ථානාධිපති ප්‍රධාන පොලිස් පරීක්ෂක කුමාර පල්ලේවෙල මහතා දිනමිණට පැවසීය. එම සැකකරුවන් ද අත්අඩංගුවට ගැනීමට විමර්ශන පැවැත්වෙන බව ඔහු සඳහන් කළේය.
මෙම අපරාධය සිදුකර ඇත්තේ අසල්වැසි නිවෙසක පදිංචිව සිටින පුද්ගලයකු රුපියල් ලක්ෂ 05ක කොන්ත්‍රාත්තුවකට ලබා දුන් ඇති බව ද විමර්ශනවලින් හෙළිවී තිබේ.
මෙම අපරාධය සිදුකිරීම සැලසුම් කළ කිතුල්ගහවත්ත, මෙනේරිය, පරකඩුව ප්‍රදේශයේ පදිංචි එම සැකකරු අවිස්සාවේල්ල මහේස්ත්‍රාත් අධිකරණයට ඉදිරිපත් කර පැය 48ක රැඳවුම් නියෝග ලබා ගෙන තවදුරටත් ප්‍රශ්න කිරීම් සිදුකරන බව පොලිසිය සඳහන් කරයි. මෙම අපරාධය සිදුකළ දින සිට පළාගොස් මෙම සැකකරු සැඟව සිටි බව ද පොලිසිය සඳහන් කරයි. දීර්ඝ විමර්ශනයකින් අනතුරුව සැකකරු අත්අඩංගුවට ගෙන ඇත්තේ පන්විල, යක්විල පිහිටි නිවෙසක සැඟව සිටියදීය. සැකකරුවන් දෙදෙනෙක් අත්අඩංගුවට ගෙන ඇත්තේ මෙම සැකකරුට සැඟවීමට ආධාර හා අනුබල දීම සම්බන්ධයෙන් බව පොලිසිය සඳහන් කළේය. ඔවුන් දෙදෙනා පන්විල පදිංචිකරුවන් වන අතර අනෙත් සැකකරු දැරණියගල පදිංචිකරුවෙකි.
එම සැකකරුවන් තිදෙනා අවිස්සාවේල්ල මහේස්ත්‍රාත් අධිකරණයට ඉදිරිපත් කිරීමෙන් අනතුරුව මෙම මස 20 වැනි දක්වා රක්ෂිත බන්ධනාගාරගත කර තිබේ.
කොන්ත්‍රාත්තුව ලබාදී ඇත්තේ තරුණයාව ඝාතනය කිරීමට නොව, ඔහුව පැහැරගෙන ගොස් පහර දී ඇසිඩ් ගැසීමට බව මෙහි මහ මොළකරු වන අසල්වැසියා ප්‍රශ්න කිරීම්වලදී පවසා ඇතැයි පොලිසිය කියයි. ඊට මුල්වී ඇත්තේ එම අසල්වැසියා මෙම තරුණයාගේ හමුදා සේවයේ සිටින සහෝදරයාගේ බිරිය සමඟ ඇතිකරගෙන තිබුණු යම් සම්බන්ධයකට එරෙහිවීමකි. ඒ හේතුවෙන් සැකකරු මෙම තරුණයා ඇතුළු පවුලේ සාමාජිකයන් සමඟ වෛරයෙන් සිට ඇති බවත් දෙපාර්ශ්වය අතර ආරවුල් හා ගැටුම් තිබී ඇති බවත් පොලිසිය සඳහන් කළේය.
දෙපාර්ශ්වය අතර එක් අවස්ථාවක ඇතිවුණු ගැටුමකදී සැකකරුට ඇසිඩ් ප්‍රහාරයක් එල්ලවී ඇති බවත් ඊට පළිගැනීමට හා සහෝදරයාගේ බිරිය ඇගේ මහගෙදරට පිටත්කර යැවීම හේතුවෙන් තරුණයා සමඟ ඔහු වෛරයෙන් පසුවී ඇති බවත් විමර්ශනවලින් අනාවරණය වී ඇත.
මේ හේතූන් මුල්කරගෙන තරුණයා පැහැරගෙන ගොස් පහරදී ඇසිඩ් ගැසීමට කොන්ත්‍රාත්තුව භාරදී ඇති බව සැකකරුගෙන් කළ ප්‍රශ්න කිරීමේදී අනාවරණය වී තිබේ.
ඒ අනුව කොන්ත්‍රාත්තුව භාරගත් පිරිස ඇහැළියගොඩ, පරකඩුව ප්‍රදේශයේ නිවෙසකට පසුගිය ඔක්තෝම්බර් 19 වැනිදා සවස, පොලිස් නිලධාරීන් ලෙස පෙනීසිටිමින් ජීප් රථයකින් පැමිණ තිබුණි.
ඔවුන් නිවෙසේ සිටි 23 හැවිරිදි තරුණයා මාංචු දමා රැගෙන යෑමට සූදානම් වෙද්දී, ඊට ඔහුගේ මවුපියන් විරෝධය දක්වා ඇත. එහිදී පිරිස බලහත්කාරයෙන් තරුණයා ජීප් රථයට නංවාගෙන රැගෙන යෑමට උත්සාහ දරා තිබේ.
එම අවස්ථාවේ ක්‍රියාත්මක වූ පියා, ජීප් රථයේ එල්ලී ඔවුන්ට බාධා කළ ද රථය නොනවත්වා ධාවනය කර ඇති අතර එහිදී පියා බිම ඇදවැටී තිබුණි.
පොලිසිය සඳහන් කළේ ජීප් රථයේ රියැදුරා පියාව රථයට යටකරමින් එය ඉදිරියට ධාවනය කර ඇති බවය. එහිදී බරපතළ තුවාල ලැබූ 65 හැවිරිදි පියා වහාම රෝහල්ගත කෙරුණ ද ඔහු මියගොස් ඇත.
පැහැරගැනුණු තරුණයා ඇහැළියගොඩ, පනාවල ප්‍රදේශයේ පිහිටි ගල්තලාවක් වෙත රැගෙන ගොස් දරුණු ඇසිඩ් ප්‍රහාරයක් එල්ල කර, ඔහු එම ස්ථානයේ දමා පිරිස පලාගොස් ඇති බව පොලිසිය පවසයි.
දරුණු පිලිස්සුම් තුවාල සහිතවම ඒ ආසන්නයේ වූ නිවෙසකට ගිය තරුණයා දුරකතනයක් මඟින් තම ඥාතියකුට සිද්ධිය පිළිබඳව දැනුම්දී ඇත. ඒ අනුව තරුණයා ප්‍රතිකාර සඳහා රෝහල්ගත කර තිබුණි.
