ඉදිරියේදී පිහිටුවන ජාතික ජන බලවේගයේ ආණ්ඩුවක් යටතේ දෑවැන්ත කෘෂිකාර්මික නවෝදයක් ඇති කරන බව අනුරාධපුර දිස්ත්‍රික් අපේක්ෂක ප්‍රගීත් ඉලංගසිංහ මහතා පැවසීය.
රටේ ආර්ථිකයට උරදෙන ගොවීන්ගේ ආර්ථික සංවර්ධනය කෙරෙහි ඉදිරියේදී පිහිටුවන ජාතික ජන බලවේග ආණ්ඩුව දැඩි අවධානය යොමු කර ඇතැයි ඔහු ප්‍රකාශ කළේය.
වී ගොවින්ගේ මෙහෙයුම් පිරිවැය අවම කිරීමට සැලසුම් කර තිබෙනවා.ඒ යටතේ ගොවි ජන සේවා මධ්‍යස්ථාන කේන්ද්‍ර කර ගනිමින් ගොවිතැනට අවශ්‍යය ගොවී උපකරණ,යන්ත්‍ර සූත්‍ර පහසු මිලට කුලියට ගැනීමට ගොවියාට අවකාශය සැලසෙයි.අද වන විට ට්‍රැක්ටර්,කොළ මඩින යන්ත්‍ර වැනි කෘෂිකාර්මික උපකරණ සහ යන්ත්‍ර සූත්‍රවල පිරිවැය ගොවියාට දැරිය නොහැකි මට්ටමට ඉහළ ගොස් තිබෙනවා. ඒ නිසාම වී ගොවිතැනේ නිෂ්පාදන පිරිවැය ද ඉතා අධිකයි.එබැවින් වී ගොවිතැනේ නිෂ්පාදන පිරිවැය අවම කිරීමේ අරමුණින් මේ කෘෂි උපකරණ සහ යන්ත්‍ර සූත්‍ර පහසු මිලට කුලියට ලබා ගැනීමට ගොවියාට අවස්ථාව සැලසෙයි. මේ සඳහා අවශ්‍ය කටයුතු ඉදිරි අයවැයෙන් ක්‍රියාත්මක කරන බව ද ඔහු පැවසීය. අපේ රටේ දේශගුණයට කාලගුණයට ගැලපෙන ආකාරයේ බීජ වී ගොවියාට ලබාදීමට පියවර ගන්නවා.අද වන විට ගොවීන් බහුලව භාවිතා කරන දෙමුහුන් බීජ අප රටේ කාලගුණය,දේශගුණය එවැනි පරිසර සාධකවලට නොගැලපෙන බැවින් බහුලව ලෙඩ රෝගවලට ගොදුරු වෙනවා.එබැවින් රටේ කාලගුණික,දේශගුණික සහ පාංශු වැනි අනෙකුත් කෘෂිකාර්මික සාධකවලට ගැලපෙන ආකාරයේ රටට ගැලපෙන උසස් තත්ත්වයේ බිත්තර වී ගොවීන්ට ලබාදීමට ක්‍රියාමාර්ග ගැනීමට පියවර ගන්නවා.මෙමඟින් ද ගොවීන්ට වී වගාවට කෘමිනාශක,වල්නාශක සහ පොහොර යෙදීමට වැය වන අධික පිරිවැය අවම කිරීමට හැකිවේවි.
කෘෂිකාර්මික ක්ෂේත්‍රයේ අද භාවිතා වන නවීන තාක්ෂණය ගොවීන් වෙත සන්නිවේදනය කිරීමටද පියවර ගන්නවා. මෙමගින් භූමි ඵලදායීතාව ඉහළ නැංවීමටත්,අස්වැන්නේ ගුණාත්මකභාවය ඉහළ නැංවීමටත් ගොවීන්ට හැකියාව ලැබෙනු ඇත.
මේ සියලු සාධක හේතුවෙන් නිෂ්පාදන පිරිවැය විශාල වශයෙන් පහත හෙළීමට ගොවීන්ට අවස්ථාව උදාවනු ඇත.එබැවින් වී වගාව ආර්ථික වශයෙන් ලාභ දායක කර්මාන්තයක් බවට පත්වනු ඇත. මෙමඟින් අද වන විට කෘෂිකර්මාන්තයෙන් ඉවත්ව සිටින තරුණ පරපුර නැවත වතාවක් කෘෂිකර්මයට යොමුවනු ඇතැයි අපේක්ෂා කරන බවද ඔහු අවධාරණය කළේය.
