මීගොඩ පොලිස් වසමේ ගොඩගම ප්‍රදේශයේ 41 හැවිරිදි විවාහක මවක තම දරු දෙදෙනා හා පවුලේ සියලු දෙනා අතහැර 30 හැවිරිදි අනියම් පෙම්වතා සමඟ ඊයේ (6) පෙරවරුවේ මීගොඩ පොලිස් ස්ථානයෙන් පිටවී ගොස් තිබේ. එම විවාහක කාන්තාවගේ සැමියා විදේශගතව සිටින අතරවාරයේ ඇය අනියම් සම්බන්ධතාවක් ගොඩනඟාගෙන ඇති අතර, පෙරේදා (5) රාත්‍රියේ තම 20 හැවිරිදි දියණිය සහ 12 හැවිරිදි පුතා නිවෙසේ තනි කර දමා නිවෙසින් පිටව ගොස් ඇත. දරු දෙදෙනා තමන්ගේ මව නිවෙසේ නොමැති බව ආච්චි අම්මාගේ (පියාගේ මව) නිවෙසට ගොස් ඔවුන්ට පවසා තිබේ. ඔවුන් ද ඇය ගැන සොයා බලා ඇති අතර, ඇය සොයා ගැනීමට නොහැකි බැවින් සිද්ධිය සම්බන්ධයෙන් මීගොඩ පොලිසියට පැමිණිලි කර තිබේ.
ඊයේ (6) පෙරවරුවේ එම පැමිණිල්ල සම්බන්ධයෙන් මීගොඩ පොලිස් ස්ථානයේ කාන්තා උප පොලිස් පරීක්ෂිකා තුෂාරි මහත්මිය සහ පො.සැ. (7394) ජයතිලක මහතා මෙම ආරවුල විසඳීමට විශාල උත්සාහයක් ගනු ලැබුව ද, මෙම මව, දරු දෙදෙනා සමඟ ආපසු තම නිවෙසට යෑම ප්‍රතික්ෂේප කර අනියම් සැමියා සමඟ යෑමට දැඩි කැමැත්තක් දැක්වීම හේතුවෙන්, මෙම ගැටලුව විසඳීමට මීගොඩ පොලිස් ස්ථානාධිපතිවරයාට යොමු කර ඇත. දරු දෙදෙනාගේ සහ පවුලේ ඉල්ලීම ඉටුකර නැවත දරු දෙදෙනා සමඟ නි‍ෙවසට ගොස් සමගියෙන් ජීවත් වන ලෙසට ස්ථානාධිපතිවරයා මෙම කාන්තාවට උපදෙස් දුන්න ද, ඇය එයට එකඟ වී නොමැත. ඒ අනුව ඔවුන්ගේ කැමැත්ත මත පොත්වල සටහන් තබා එම විවාහක කාන්තාව අනියම් පෙම්වතා සමඟ පිටව ගොස් තිබේ.
