පාසල් ළමුන් බසයට නංවාගැනීම ප්‍රතික්ෂේප කළ රියැදුරු සහ කොන්දොස්තරවරයකු වැඩ තහනමකට ලක්කළ බව කළුතර දිස්ත්‍රික් ප්‍රධාන ප්‍රාදේශීය කළමනාකාර කාර්යාලය සඳහන් කළේය.
මෙසේ වැඩ තහනමට ලක්ව ඇත්තේ අලුත්ගම – කොළඹ ධාවනය වූ අලුත්ගම ඩිපෝවට අයත් අංක NC 0755 දරන බස් රථයේ සේවය කළ රියැදුරු සහ කොන්දොස්තරවරයාය. අලුත්ගම, මතුගම සහ කළුතර ඩිපෝවට අයත් බස් රථ කළුතර සහ වාද්දුව අතර රැඳී සිටින පාසල් ළමුන් නංවා ගැනීම කාලයක සිට ප්‍රතික්ෂේප කරන බවට වත්මන් සභාපති රමාල් සිරිවර්ධන මහතාට ලද තොරතුරක් මත එම ඩිපෝවල අධිකාරිවරුන් පාසල් ළමුන් රැඳී සිටින බස් නැවතුම්පොළවල රඳවා බස් රථ නවත්වන ලෙස ඔවුන්ට උපදෙස් දී තිබිණ. ප්‍රධාන ප්‍රාදේශීය කළමනාකරු එම උපදෙස් පරිදි කටයුතු කර තිබේ. එහෙත් එදින පමණක් එම බසය නවත්වා පසුව නැවත නොනවත්වා ධාවනය කිරීමට එම රියැදුරන් කටයුතු කර ඇති බවට වාර්තා වූ බව කළුතර ලංගම උසස් නිලධාරියකු පැවසීය.
ඒ අනුව ඊයේ (6) නැවත ඩිපෝ අධිකාරිවරුන් මෙන්ම ජංගම පරීක්ෂකවරුන් ද යොදවා පරික්ෂා කිරීමේදී රියැදුරු සහ කොන්දොස්තරවරයා එම නිලධාරීන් සමග ද බහින්බස්වීමක් සිදු කරගෙන තිබූ බව සඳහන් වේ. එහිදී රියැදුරු, Òමොකා කීවත් ආයේ නවත්වන්නේ නෑ, පුළුවන් දෙයක් කරන්න.Ó යනුවෙන් පවසා පිටව ගොස් ඇති බව ද වාර්තා වේ. සිද්ධිය ජංගම දුරකතන දර්ශන සමගින් ලංගම නව සභාපති රමාල් සිරිවර්ධන මහතාට සැලකිරීමත් සමඟ අදාළ රියැදුරු සහ කොන්දොස්තරවරයා සේවයෙන් පහකිරීමට පියවර ගත් බව කළුතර දිස්ත්‍රික් ප්‍රධාන ප්‍රාදේශීය කළමනාකාර කාර්යාලය සඳහන් කළේය.
