කහටගස්දිගිලිය පඬරැල්ලෑව ප්‍රදේශයේ ප්‍රසිද්ධ පාසලක ගුරුවරයකු තම ගුරු නිවාසයේදී යුද හමුදා සෙබළකු සමඟ අයිස් මත්ද්‍රව්‍ය භාවිත කරමින් සිටියදී සහ පාසල අසල අයිස්ක්‍රීම් වෙළෙඳාම් කරන මුවාවෙන් පාසල් සිසුන්ට අයිස් මත්ද්‍රව්‍ය අලෙවි කරමින් සිටි පුද්ගලයකු දිවුල්වැව පොලිසිය විසින් අත්අඩංගුවට ගනු ලැබිණ.
මෙ‍ෙලස අත්අඩංගුවට ගෙන ඇත්තේ පොලොන්නරුව ප්‍රදේශයේ පදිංචි 30 හැවිරිදි තාක්ෂණික විෂය උගන්වන ගුරුවරයකුත්, වවුනියාව යුද හමුදා කඳවුරකට අනුයුක්තව සේවය කරන කහටගස්දිගිලිය, මීමින්නාවල පදිංචි 25 හැවිරිදි යුද හමුදා සෙබළකු සහ මීමින්නාවල ප්‍රදේශයේම පදිංචි අයිස්ක්‍රීම් වෙළෙඳාමේ නිරත වූ 32 හැවිරිදි පුද්ගලයෙකි. දිවුල්වැව පොලිස් ස්ථානාධිපති පොලිස් පරීක්ෂක බී.එම්.ඩබ්ලිව්. කෝදාගොඩ මහතාට පෙරේදා (5)දින රාත්‍රී 8.00ට පමණ ලද තොරතුරක් මත ස්ථානාධිපතිවරයා ඇතුළු පොලිස් කණ්ඩායමක් අදාළ පාසලේ ගුරු නිවාසයේ වැටලීමක් සිදු කර ඇත. එම අවස්ථාවේ මෙම ගුරු නිවාසයේ නේවාසිකව සිටින ගුරුවරයකු හා තවත් පුද්ගලයකු අයිස් මත්ද්‍රව්‍ය පාවිච්චි කරමින් සිට ඇති අතර, ඔවුන් සතුව තිබී අයිස් මත්ද්‍රව්‍ය මිලිග්‍රෑම් 20ක් පොලිසිය විසින් සොයාගෙන තිබුණි. මෙම සැකකරුවන් අත්අඩංගුවට ගැනීමෙන් අනතුරුව ඔවුන්ගෙන් කළ ප්‍රශ්නකිරීම් අනුව මෙම පාසල අසල අයිස්ක්‍රීම් වෙළෙඳාම් කරන මුවාවෙන් පාසල් සිසුන්ට අයිස් මත්ද්‍රව්‍ය අ‍ෙලවි කළ පුද්ගලයා ද අත්අඩංගුවට ගෙන ඇත. ඔහු සන්තකයේ තිබී අයිස් මත්ද්‍රව්‍ය මිලිග්‍රෑම් 20ක් ද පොලිසිය සොයාගෙන තිබේ.
මෙම සැකකරු කලක පටන් මෙම පාසල අසල අයිස්ක්‍රීම් වෙළෙඳාම් කරන මුවාවෙන් සිසුන්ට මත්ද්‍රව්‍ය අ‍ෙලවි කර ඇති බවත්, මීට ඉහතදීත් පොලිස් අත්අඩංගුවට පත්වූ පුද්ගලයකු බවත් පොලිසිය පැවසීය. සැකකරුවන් දිවුල්වැව පොලිස් අත්අඩංගුවේ පසුවන අතර, ඔවුන් කහටගස්දිගිලිය මහේස්ත්‍රාත් අධිකරණයට ඉදිරිපත් කිරීමට
නියමිතය.
