නුවරඑළියේ කාන්තාවන්ගේ සහ ගොවීන්ගේ ගැටලු නිරාකරණය කරගැනීමට කටයුතු කරන බව සමගි ජන බලවේගයේ නුවරඑළිය දිස්ත්‍රික් අපේක්ෂිකා, නීතිඥ හිරණ්‍යා හේරත් මහත්මිය ප්‍රකාශ කළාය. ඇය මේ බව පැවසුවේ වලපනේ, උඩුපුස්සැල්ලාවේ දී පැවති ජන හමුවක් අමතමිනි.
එහිදී වැඩිදුරටත් අදහස් දැක්වූ ඇය මෙලෙස ද කීවාය.
“මේ ප්‍රදේශයේ ජීවත්වන කාන්තාවන්ගෙන් වැඩි දෙනා ගොවිතැන ආශ්‍රිතව වැඩ කරමින් සිටින අය. තවත් පිරිසක් කුලී වැඩ කරනවා. බහුතරයක් කිසිදු රැකියාවක යෙදෙන්නේ නෑ. එනිසා ඔවුන් දැඩි දරිද්‍රතාවකින් පෙළෙනවා. ඔවුන් එම තත්ත්වයෙන් මුදාගැනීමට ගෘහ ආශ්‍රිත ස්වයං රැකියා ව්‍යාපෘතියක් ආරම්භ කර එම නිෂ්පාදන අලෙවි කරගැනීමට වැඩපිළිවෙළක් සකස් කරනවා. නිවෙසේ සහ දරුවන්ගේ වැඩ කටයුතුවලට මුල්තැන දෙමින් තම ස්වාමිපුරුෂයා සමඟ ගොවිතැනේ යෙදෙන කාන්තාවන් මේ ප්‍රදේශයේ බහුලව සිටියත් ඔවුන්ගේ ජීවන මට්ටම ඉතා පහත් මට්ටමක තිබෙන්නේ. ඒ ඔවුන්ගේ කෘෂි නිෂ්පාදන සාධාරණ මිලකට අලෙවි කරගැනීමට නොහැකිවීම නිසයි. ඒ අනුව ගොවිතැන, ගොවි මහතුන් සහ ඒ ආශ්‍රිත රැකියාවල යෙදෙන පුද්ගලයන් මුහුණ දෙන ගැටලු පිළිබඳව සාකච්ඡා කර ඒ ගැටලුවලට විසඳුම් දෙනවා.
කෘෂි කාර්මික භෝග වගාවේදී අත්‍යවශ්‍යම සාධකය වන ජල ගැටලුව විසඳීමට පවතින වැව් අමුණු ප්‍රතිසංස්කරණය සහ නව ජල සම්පාදන ක්‍රම ඇති කරන බවට පොරොන්දු වෙනවා. මේ පිළිබඳ විශේෂ අවධානය යොමු කර ව්‍යාපෘති කිහිපයක් ආරම්භ කර වැඩ නිම කර තිබෙනවා. තරුණ පරම්පරාව කෘෂි නිෂ්පාදනවලින් ඈත්වීම උග්‍ර ගැටලුවක්. එනිසා කෘෂිකර්මයට නැඹුරු කිරීම වෙනුවෙන් විශේෂ වැඩසටහනක් ක්‍රියාත්මක කරනවා. නවීන කෘෂි තාක්ෂණික ක්‍රම හඳුන්වාදීමටත් කටයුතු කරනවා.”
