ආණ්ඩුව තුනෙන් දෙකක බලය ඉල්ලන බවත්, රටේ වෘත්තීය සමිති මර්දනය කරමින් මාධ්‍යයට තර්ජනය කරමින් ජනතාවගේ හඬ යටපත් කළ නොහැකි බවත් ශ්‍රී ලංකා පොදුජන පෙරමුණේ පොලොන්නරුව දිස්ත්‍රික් අපේක්ෂක ජානක නලීන් කුමාර මහතා පවසයි.
ඒ මහතා මේ අදහස් පළ කළේ පසුගියදා පොලොන්නරුවේදී පැවති මාධ්‍ය හමුවකට එක් වෙමිනි.
එහිදී වැඩිදුරටත් අදහස් දක්වමින් ඒ මහතා මෙසේ ද පවසා සිටියේය.
“අපි ආණ්ඩුවට කියනවා, බොරුවට තර්ජනයට මේ රටේ ජනතාව රැවටෙන්නේ නෑ කියලා. මේ රටේ බුද්ධිමත් ජනතාවක් ඉන්නේ. ඒ නිසා වෘත්තීය සමිති, මාධ්‍ය පාලනය කරන්න සූදානම් වෙන්න එපා. දුන් පොරොන්දු ඉටු කළේ නැත්නම් අපි මේ රටේ උගත්, බුද්ධිමත් ජනතාව වගේම සඟ, වෙද, ගුරු, ගොවි, කම්කරු පංච මහා බලවේගයත්, ආරක්ෂක අංශයත් එකතු කරගෙන මේ ආණ්ඩුව පලවා හැරීමේ සටන ඉක්මනින් පටන් ගන්නවා. ඒ වගේම රජයේ සේවකයන්ට දෙනවා කියූ වැටුප් වැඩි කිරීම්, විදුලි බිල සහනය, ඉන්ධන සහන දෙන්න කියලා අපි ආණ්ඩුවට බල කරනවා.”
