සියලු අංශ ආවරණය කරමින් ශක්තිමත් කණ්ඩායමක් මෙවර පාර්ලිමේන්තු මැතිවරණයට ඉදිරිපත් කර තිබෙන බව ජාතික ජන බලවේගයේ පුත්තලම දිස්ත්‍රික් අපේක්ෂක, ජ්‍යෙෂ්ඨ මහාචාර්ය චන්දන අබයරත්න මහතා ප්‍රකාශ කරයි.
ඒ මහතා මේ බව පැවැසුවේ පසුගියදා පුත්තලම නගරයේ පැවැති ජන හමුවකදීය.
එහිදී වැඩිදුරටත් අදහස් දැක්වූ ඒ මහතා මෙලෙස ද කීවේය.
“වෘත්තීය දැනුම මෙන්ම දේශපාලන අත්දැකීම් සහිත කණ්ඩායමක් අපේ පක්ෂයෙන් ඉදිරිපත් කර තිබෙනවා. දේශපාලනික වශයෙන් කිසිදු තරගයක් නෑ. පුත්තලම දිස්ත්‍රික්කයෙන් අපේක්ෂකයන් හය දෙනකු ජයග්‍රහණය කරවීම අපේක්ෂාවයි.
පුත්තලම දිස්ත්‍රික්කයේ සිටි ප්‍රබල දේශපාලනඥයන් මෙවර මැතිවරණයට ඉදිරිපත් වෙන්නේ නෑ. ජනතාවගෙන් ප්‍රතික්ෂේප වීමට පෙර ඔවුන් තරගයෙන් ඉවත්වී තිබෙනවා. ඒ අනුව අපට මෙවර අපේක්ෂකයන් හය දෙනකුම පාර්ලිමේන්තුවට යවන්න හැකියාව ලැබෙනවා. ඒ වෙනුවෙන් අවශ්‍ය කටයුතු කරගෙන යනවා. අපේ දිස්ත්‍රික්කයේ සංවර්ධනය මෙන්ම ජනතාවගේ අවශ්‍යතා සම්බන්ධයෙන් මේ වන විට අපේ අවධානය යොමුව තිබෙනවා.
වෙරළ තීරය ධීවර සහ සංචාරක කර්මාන්තවලට එකසේ වැදගත්. එය ඵලදායී ලෙස භාවිත කරන්න පුළුවන්. නමුත් මේ දක්වා එයින් නිසි ප්‍රයෝජන ගෙන නෑ. සංචාරක ගමනාන්තයක් වශයෙන් අපේ රටට එන සංචාරකයන් බොහෝ පිරිසක් මේ දිස්ත්‍රික්කයේ සංචාරය කරනවා. ඒ නිසා මේ දිස්ත්‍රික්කයේ සංචාරක කර්මාන්තය ප්‍රවර්ධනය අත්‍යාවශ්‍යයි. මේ දිස්ත්‍රික්කයේ කෘෂිකර්මාන්තය දියුණු කිරීමට වැව් 400ක් පමණ ප්‍රතිසංස්කරණය කිරීමට අවශ්‍යයි. ඒ වෙනුවෙන් අපි සහාය දිය යුතුයි. පුත්තලම දිස්ත්‍රික්කයේ අධ්‍යාපනය සහ සෞඛ්‍ය දියුණු කළ යුතුයි. ගුරු හිඟයත්, පාසල් පද්ධතියේ පවතින අඩුපාඩුත් විසඳීමට අපේක්ෂා කරනවා.”
