වත්මන් ආණ්ඩුව ඉදිරියටත් රට පාලනය කරන්නේ පසුගිය දින 42ක කාලයේ සිදු කළ ආකාරයට නම් තවත් වසරකින් හිටපු ජනාධිපති රනිල් වික්‍රමසිංහ මහතා ප්‍රමුඛ ගෑස් සිලින්ඩරයේ කණ්ඩායමට මෙරට පාලනය භාර ගැනීමට සිදු වන බව නව ප්‍රජාතන්ත්‍රවාදී පෙරමුණේ නුවරඑළිය දිස්ත්‍රික් අපේක්ෂක කේ.කේ. පියදාස මහතා පැවසීය.
ඒ මහතා මේ අදහස් පළ කළේ ඉකුත්දා (04) මස්කෙළිය නගරයේ පැවති මැතිවරණ ප්‍රචාරක කටයුතුවලට එක් වෙමිනි.
එහිදී වැඩිදුරටත් අදහස් දැක්වූ ඒ මහතා මෙසේ ද පැවසීය.
“අනුර කුමාර දිසානායක ජනාධිපතිවරයා ප්‍රමුඛ ආණ්ඩුව ගෙන යන පාලනය දෙස බලන විට රට ඉදිරියට ගෙන යෑමට ඔවුන්ට නිසි වැඩපිළිවෙළක් සහ දර්ශනයක් නැති බව පැහැදිලියි. දිනෙන් දින රට අගාධයට ගමන් කරමින් තිබෙනවා. මේ තත්ත්වය මත යළිත් මාස හයක් ගත වන විට රනිල් වික්‍රමසිංහ මහතාට රට භාර ගැනීමට සිදු වෙනවා. මෙහෙම කියන්නේ ජනාධිපති පන්නන්න ඕන කියන කුහක පදනමකින් නොවෙයි. එවැනි දේශපාලනයක අපි නෑ. හැබැයි අපට රට පිළිබඳව හැඟීමක් තියෙනවා.
මෙරට ආර්ථික අර්බුදය සම්බන්ධව අපට කටයුතු කරන්න තියෙන්නේ ගෝලීය ප්‍රජාවත් සමඟයි. පැරිස් සමාජය, ජාත්‍යන්තර මූල්‍ය අරමුදල, චීනය, ඉන්දියාව සමඟ කටයුතු කරන ආකාරය ගැන සාකච්ඡා කරමින් ඉදිරියට යන්න තිබෙනවා. සාමාන්‍යයෙන් මෙරට නායකයෙක් පත්වුණාම ඉන්දියාවට ගිහින් එහි නායකයා හමුවෙනවා.”
