කිසිදු සාක්ෂියක් නොමැතිව තමන්ට බරපතළ චෝදනාවක් එල්ල කළ සියලුම දෙනාටම එරෙහිව ඉදිරියේදී නීතිමය ක්‍රියාමාර්ග ගැනීමට බලාපොරොත්තු වන බව වඳ සැත්කම් නඩුවෙන් නිදහස ලැබූ වෛද්‍ය ෂියාබ්දීන් ෂාෆි මහතා කුරුණෑගලදී ප්‍රකාශ කළේය.
වෛද්‍යවරයා මේ බව ප්‍රකාශ කළේ අදාළ නඩුවෙන් නිදහස ලබා අධිකරණ භූමියෙන් පිටතට පැමිණි අවස්ථාවේදීය. එහිදී ඔහුගේ පවුලේ ඥාතීන් සහ හිතවතුන් ඔහුව පිළිගනු ලැබුවේ මල්මාලා පලදවමිනි.
එහිදී මාධ්‍යවේදීන් හමුවේ වෛද්‍යවරයා මෙසේ ද අදහස් දැක්වීය. ‘‘අවංකවම මට ඉතාම සතුටුදායක දවසක් අද. මොකද අද වෙනකල් අවුරුදු පහයි මාස හයක් කිසිම චෝදනාවක් නැතිව සමහරුන්ගේ පෞද්ගලික අවශ්‍යතාවන් ඉෂ්ටකර ගැනීම සඳහා මමයි මගේ බිරියයි දරුවොයි පවුලේ අයයි විඳපු දුකට අද නිමාවක් ලැබිලා තියෙනවා. මා වෙනුවෙන් පෙනී සිටි සමාජයේ උසස්ම නිලධාරීන්ටයි, මාව නිදහස් කරපු නීතිපති දෙපාර්තමේන්තුවටයි මම හදවතින්ම ස්තුතිවන්ත වෙනවා. ඒ වගේම මා වෙනුවෙන් පෙනී සිටිය නීතිඥවරුන් විශාල පිරිසකටත් ස්තුතිය පුද කරනවා. මාව විශ්වාස කරගෙන හිටිය සමාජයේ සියලුම දෙනාටත් ස්තුතිවන්ත වෙනවා. කිසිම චෝදනාවක් නැතිවයි මාව සිරගත කරලා තිබුණේ. මගේ කතාව පටන් ගත්තේ මාව ඇරෙස්ට් කරලා සාක්ෂි සොයමින් පරීක්ෂණ ආරම්භ කරලා. මගේ නඩුව තිබුණු දවස්වල කුරුණෑගල නගරය යුද පිටියක් වුණා. ජනාධිපති නීතිඥවරුන් විශාල පිරිසක් මේ බොරුව වෙනුවෙන් පෙනි සිටියා. මේක මට විතරක් නොවෙයි මුළු රටටම ලබා දුන්න සාධාරණ තීන්දුවක් විදිහටයි මම දකින්නේ. සියලුම දෙනාගේ ජයග්‍රහණයක් විදිහටයි මම දකින්නේ. නිලධාරි ඇඳුම ඇතුළේ ඉඳගෙන මේක කරපු අයට විරුද්ධව ගතයුතු ක්‍රියාමාර්ග ගැන මගේ නීතිඥ මහත්වරුන් සමඟ එකතු වෙලා මම කතා කරනවා. මටයි මගේ පවුලටයි වෙච්චි මේ වගේ දෙයක් මේ රටේ කිසිවෙකුට සිදු නොවේවා කියා මා ප්‍රාර්ථනා කරනවා. වෛද්‍යවරයකු ලෙස මගේ සේවය ඉදිරියටත් මේ රටට ලබාදීමට මම සූදානම් කියා ප්‍රකාශ කරනවා. දේශපාලනයට එහා ගිහිල්ලා හොඳ දේවල් කරන්න පුළුවන් කියා මා විශ්වාස කරනවා. දැනට ඉන්න ජනාධිපතිවරයා මගේ ගමේ කෙනෙක්. එයා තමයි මා වෙනුවෙන් පළමුවෙන්ම පාර්ලිමේන්තුවේ හඬ නැඟුවේ. රාජිත සේනාරත්න, එරාන් වික්‍රමරත්න, මුජිබර් රහුමන් මන්ත්‍රීතුමාලත් මා වෙනුවෙන් හඬ නැඟුවා. රටේ හොඳ වෙනසක් වෙනුවෙන් සහභාගි වීමට මම ඕනෑම අවස්ථාවක සූදානම්. මේ දේට පළිගැනීමේ චේතනාවක් මට නැහැ. මගේ කතාව ඉහළටම ගෙනැල්ලා ආණ්ඩුවක් පෙරළන්න මුස්ලිම් ජාතිය මුල් කරගෙන කරපු තිරනාටකයත් කුමන්ත්‍රණයක්. ඒ නාටකය දැන් ඉවරයි. මාව බිලි දීපු එක ගැන කනගාටුයි. නැවත මෙවැනි දෙයක් වෙන කාටවත් සිදු නොවන ආකාරයට ගන්න පුළුවන් නීතිමය පියවර මම ගන්නවා.”
ජනාධිපති නීතිඥ මෛත්‍රී ගුණරත්න මහතා-
“මේ නඩු තීන්දුව ගැන රටේ අධිකරණ ඇමැතිවරයාගේ, අගමැතිතුමියගේ ඇස් ඇරෙන්න ඕනෑ. නීති ක්ෂේත්‍රයේ සියලුම දෙනාගේ ඇස් ඇරෙන්න ඕනෑ. අපේ ව්‍යවස්ථාවේම තියෙනවා නිර්දෝෂිභාවයේ පූර්ව නිගමනය කියලා. මේ නඩුවේ නිර්දෝෂිභාවයේ පූර්ණ නිගමනය ක්‍රියාත්මක වුණේ නැහැ. යම් දේශපාලන න්‍යායපත්‍රයකට කටයුතු කරමින් දේශපාලනඥයන්ට අවශ්‍ය විදිහට සී.අයි.ඩි.යයි රජයයි මෙහෙයවලා කරපු ක්‍රියාදාමයක් තමයි මේ. කිසිම සාක්ෂියක් තිබුණේ නැහැ. අපේ රටේ අපරාධ නඩුවලින් සීයට අනූවක්ම විත්තිකාරයෝ නිදහස් වෙනවා. ඒකට හේතුව තමයි හරියට විමර්ශනයක් සිදු නොවීම. හරිහැටි විමර්ශන කරලා නඩු දැම්මොත් නියම අපරාධකාරයෝ හිරේ දාන්න පුළුවන් වෙනවා. නමුත් මේ නඩුවෙන් වුණේ මේ වගේ කතාවක් හදලා ෂාෆිව බිලි දීලා ජන්දය ජයග්‍රහණය කිරීමයි. ෂාෆිට විරුද්ධව අබමල් රේණුවක තරම්වත් වරදක් තිබිලා නැහැ.”
