ගම්පහ පිහිටි මූල්‍ය ආයතනයක සිදුවූ කොල්ලයක් සම්බන්ධයෙන් කළ විමර්ශනයක් අතරතුර පුද්ගලයකු සැකපිට අත්අඩංගුවට ගෙන නීති විරෝධී ලෙස දින 06ක් රඳවා ගනිමින් ඔහු සතු දේපළ හා මුදල් කොල්ලකෑ බව කියන ගම්පහ පොලිසියේ දූෂණ මර්දන අංශයේ හිටපු ස්ථානාධිපති ලෙස සේවයේ නිරතව සිටි උප පොලිස් පරීක්ෂකවරයකු සහ සැරයන්වරයකු සමඟ ව්‍යාපාරිකයකු අපරාධ පරීක්ෂණ දෙපාර්තමේන්තුවේ මනුෂ්‍ය ඝාතන හා සංවිධානාත්මක අපරාධ විමර්ශන කොට්ඨාසය මඟින් පෙරේදා (05) අත්අඩංගුවට ගෙන තිබේ. අපරාධ පරීක්ෂණ දෙපාර්තමේන්තුවේ නිලධාරීන් විසින් අත්අඩංගුවට ගන්නා විට ඔවුන් දෙදෙනාම සේවයේ නිරතව සිටියේ වැලිවේරිය පොලිස් ස්ථානයට අනුයුක්තවය. ව්‍යාපාරිකයා දොඩංගොඩ, ගංඉම පදිංචිකරුවෙකි.
වයස අවුරුදු 35ක් වන උප පොලිස් පරීක්ෂකවරයාත් වයස අවුරුදු 39ක් වන සැරයන්වරයාත් 53 හැවිරිදි ව්‍යාපාරිකයාත් ගම්පහ වැඩබලන මහේස්ත්‍රාත් මහේෂ් හේරත් මහතා හමුවට ඊයේ (06) ඉදිරිපත් කිරීමෙන් අනතුරුව ලබන 20 වැනිදා දක්වා රක්ෂිත බන්ධනාගාරගත කර ඇත. එදිනට හඳුනා ගැනීමේ පෙරට්ටුවක් පැවැත්වීමට ද නියෝග කර තිබේ.
මෙම සිදුවීම වී ඇත්තේ 2021 වසරේදීය. ගම්පහ පිහිටි මූල්‍ය ආයතනයකට අවි ආයුධ රැගෙන කඩාවැදුණු දෙදෙනකු එම වසරේ ජූලි 15 වැනිදා රුපියල් කෝටි ගණනක මුදලක් හා රන් භාණ්ඩ කොල්ලකා තිබිණි. ඒ සම්බන්ධයෙන් පොලිස් කණ්ඩායම් කිහිපයක්ම විමර්ශන පවත්වන අතරතුර අත්අඩංගුවට ගත් ගම්පහ පොලිසියේ දූෂණ මර්දන අංශයේ ස්ථානාධිපති සහ සැරයන්වරයා එම කොල්ලය සම්බන්ධයෙන් සැකපිට යැයි කියා පුද්ගලයකු අත්අඩංගුවට ගෙන ඇත්තේ එම වසරේ අගෝස්තු 01 වැනිදාය. බදුල්ල, තල්දෙන ප්‍රදේශයට ගොස් ඔහුව අත්අඩංගුවට ගෙන ඇත්තේ ඔහු සම්බන්ධයෙන් වූ කල්ක්‍රියාව හා හැසිරීම ගැන තිබුණු තොරතුරු පදනම් කරගෙනය.
මෙම පුද්ගලයාව අත්අඩංගුවට ගැනීමෙන් අනතුරුව මෙම පොලිස් නිලධාරීන් ඔහුට අයත් බව කියැවෙන දොම්පේ, සමනලබැද්දේ පිහිටි නිවෙසකට ගොස් නිවෙස පරික්ෂා කර බලා එහි තිබුණු මුදල් එකතු කර ඇති කැට පවා කඩා ඒ තුළ තිබූ මුදල් ද ඇතුළුව රුපියල් 283,500ක මුදලක් ද රන් භාණ්ඩ කිහිපයක් ද ලබාගෙන තිබේ. අනතුරුව මෙම පුද්ගලයාට අයත් බැංකු කාඩ්පතක් ද රැගෙන ඔහුව බැංකුවක ඒ.ටී.එම්. යන්ත්‍රයක් වෙත රැගෙන ගොස් රුපියල් 145,000ක මුදලක් ද ඔහු මඟින් ලබාගෙන ඇත. මෙම පුද්ගලයා හා සම්බන්ධකම් පවත්වන කේරළ ගංජා ජාවාරම්කරුවකු ද ගෙන්වාගෙන ඔහුගෙන් ද රුපියල් ලක්ෂ 09ක මුදලක් මෙම පොලිස් නිලධාරීන් දෙදෙනා ලබාගෙන ඇති බව අපරාධ පරීක්ෂණ දෙපාර්තමේන්තු විමර්ශනවලින් අනාවරණය වී තිබේ.
මේ සියල්ල අවසානයේ මෙම පුද්ගලයාව අත්අඩංගුවට ගත් බව සටහන් තබමින් ගම්පහ පොලිසියට ඉදිරිපත් කර ඇත්තේ 2021 වසරේ අගොස්තු 06 වැනිදාය. ඒ ගම්පහ දුම්රිය ස්ථානය අසලදී ගංජා කිලෝ 02යි ග්‍රෑම් 270ක් සහ තුවක්තු කොටසක් ඔහු සතුව තිබී හමුවූ බව පවසමිනි. වෙන කිසිදු චෝදනාවක් ඔහුට එහිදී ඉදිරිපත් කර නැති බව සඳහන්ය. අධිකරණයට ඉදිරිපත් කිරීමෙන් අනතුරුව ඇප මත නිදහස් වීමෙන් අනතුරුව මෙම පුද්ගලයා ගම්පහ කොට්ඨාසය භාර ජ්‍යෙෂ්ඨ පොලිස් අධිකාරිවරයාට පැමිණිලි කරමින් පොලිස් නිලධාරීන් තමාව බදුල්ලේදී අත්අඩංගුවට ගෙන මුදල් හා රන් භාණ්ඩ කොල්ලකා බොරු ගංජා නඩුවක් පැටලවූ බව සඳහන් කර ඇත. මෙම පැමිණිල්ල ගැන පොලිස්පතිවරයාව දැනුම්වත් කරමින් ගම්පහ කොට්ඨාසය භාර ජ්‍යෙෂ්ඨ පොලිස් අධිකාරිවරයා ඉල්ලීමක් කර ඇත්තේ අපරාධ පරීක්ෂණ දෙපාර්තමේන්තුව මඟින් පුළුල් විමර්ශනයක් මේ සම්බන්ධයෙන් පවත්වන ලෙසය.
ඒ අනුව සිදු කළ විමර්ශනයක ප්‍රතිඵලයක් ලෙස මෙම පොලිස් නිලධාරීන් දෙදෙනා හා ව්‍යාපාරිකයා අත්අඩංගුවට ගෙන ඇත.
