අංශභාග තත්ත්වයෙන් පසුවන සැමියා බලා සිටියදී රෙදි කඩකින් බිරියගේ ගෙල සිරකර ඝාතනය කර රන් භාණ්ඩ කොල්ලකෑමක් සම්බන්ධයෙන් තලාතුඔය පොලිසිය විමර්ශනයක් ආරම්භ කර ඇත.
තලාතුඔය, උඩුදෙණිය ප්‍රදේශයෙන් මෙම අපරාධය පෙරේදා (05) වාර්තා විය.
ඝාතනයට ලක්ව ඇත්තේ සිතිත් ආබිදා නමැති 70 හැවිරිදි දෙදරු මවකි.
මියගිය කාන්තාව අසූ හැවිරිදි සැමියා සමඟ නි‍ෙවසේ වාසය කරන තිබෙන බවත් ඔවුන්ගේ එක් දරුවකු නි‍ෙවස ආසන්නයේ පදිංචිව සිටින බවත් පොලිසිය පවසයි.
පුද්ගලයන් දෙදෙනකු පෙරේදා (05) අලුයම 4.00ට පමණ මෙම නි‍ෙවසට පැමිණ තිබෙන බවට පරීක්ෂණ මඟින් අනාවරණය වී තිබේ. තම මව රන් මාලයක් සහ කරාබු කුට්ටමක් පැලඳ සිටි බව ඝාතනයට ලක් වූ කාන්තාවගේ පුතා පොලිසියට පවසා ඇත.
බිරිය ඝාතනය වන අවස්ථාවේ දැඩි අසනීප තත්ත්වයෙන් පසුවන සැමියා ද එම කාමරයේම සිට ඇති අතර සිද්ධිය සම්බන්ධයෙන් ප්‍රකාශයක් ලබා ගැනීමට හැකි තත්ත්වයේ ඔහු නොසිටින බව පොලිසිය පවසයි.සිද්ධියට සම්බන්ධ පුද්ගලයන් මත්කුඩු භාවිතයට ඇබ්බැහිවූවන් බවට පොලිසිය සැක කරයි. කාන්තාව විසින් ඔවුන් හඳුනා ගැනීම නිසා මෙම ඝාතනය සිදු කරන්නට ඇතැයි අනුමාන කරන බව පොලිසිය පවසයි.
සිද්ධිය සම්බන්ධයෙන් තලාතුඔය පොලිසිය වැඩිදුර විමර්ශන සිදු කරයි.
