ප්‍රමිතියෙන් තොර ඉමියුනොග්ලොබියුලින් හා රිටොක්සිමැප් නමැති ප්‍රතිදේහ එන්නත් සැපයූ බව කියන සුදත් ජානක යන සැකකරුගේ මානසික සෞඛ්‍ය තත්ත්වය යහපත් අතට පත්වී ඇති බවට සඳහන් වෛද්‍ය වාර්තාව අධිකරණයට ඉදිරිපත් කර ඇති බැවින් සැකකරු නැවත රක්ෂිත බන්ධනාගාරගත කිරීමට මාලිගාකන්ද මහේස්ත්‍රාත් ලෝචනී අබේවික්‍රම වීරසිංහ මහත්මිය පෙරේදා (05) නියෝග කළාය. ඉදිරිපත් වූ වෛද්‍ය වාර්තාවේ 22 හා 23 යන ඡේදයන් තාවකාලිකව ඉවත් කොට එම සම්පූර්ණ වාර්තාව මුද්‍රා කොට අධිකරණයේ සේප්පුව තුළ තැම්පත් කිරීමට ද නියෝග කළාය.
එම වෛද්‍ය වාර්තාවේ 22 හා 23 යන ඡේදවල සැකකරුගේ මානසික තත්ත්වයන්ට කිසිසේත් අදාළ නොවන කරුණු ඇති බවත් බාහිර පාර්ශ්වයන්ට අවශ්‍ය නොවන කරුණු අඩංගුවීම හේතුවෙන් අධිකරණය මෙම ඡේදයන් තාවකාලිකව ඉවත් කිරීමට නියෝග කළේය.
නීතිපතිවරයා වෙනුවෙන් පෙනී සිටින නියෝජ්‍ය සොලිසිටර් ජනරාල් ලක්මිණි ගිරිහාගම මහත්මියට හදිසි අවශ්‍යතාවක් හේතුවෙන් ඊයේ දින අධිකරණය හමුවේ පෙනී සිටීමට නොහැකි වීම නිසා මෙම නඩුව කෙටි දිනක නැවත කැඳවන ලෙස සැකකරු වෙනුවෙන් පෙනී සිටි නීතිඥවරයා අධිකරණයෙන් ඉල්ලා සිටියේය.
ඉල්ලීම සලකා බැලූ අධිකරණය නැවත නඩුව ලබන 11 දින කැඳවීමට නියෝග කළේය.
