ගාල්තැන්න දේවාලයේ කපුවාට අයත් අම්පිටිය, ගාල්තැන්නේ පිහිටි වාහන අංගණයේ තිබී ව්‍යාජ අංක තහඩු සහිත තවත් මොන්ටෙරෝ වර්ගයේ ජීප් රථයක් සොයා ගත් බව තෙල්දෙණිය කොට්ඨාස අපරාධ විමර්ශන අංශය පවසයි.
පොලිසිය භාරයට ගත් ජීප් රථයේ තිබූ අංක තහඩුව මෝටර් රථ ලියාපදිංචි දෙපාර්තමේන්තුවට යොමුකර සිදුකළ විමර්ශනයේ දී අනාවරණය වී ඇත්තේ එම අංකයට නිත්‍යානුකූලව ලියාපදිංචි කළ මෝටර් රථය කුලියාපිටිය ප්‍රදේශයේ කෝටිපති ව්‍යාපාරිකයකුට අයත් බවයි.
පොලිසිය ඔවුගෙන් ද ප්‍රකාශයක් සටහන් කර ගැනීමෙන් අනතුරුව ඊයේ (06) පස්වරුවේ ගාල්තැන්න දේවාල පරිශ්‍රයේ වූ වාහන අංගණයේ තිබී අදාළ මොන්ටෙරෝ වර්ගයේ ජීප් රථය පොලිසිය භාරයට ගෙන තිබේ.
මෙම වාහන අංගණයේ මොන්ටෙරෝ හා ප්‍රාඩෝ ජීප් රථ ද ඩිෆෙන්ඩර් හා කාර් රථ ද ඇතුළු වාහන 12ක් තිබෙන බව පොලිසිය පවසයි.
එම වාහනවල අංක මෝටර් රථ ලියාපදිංචි කිරීමේ දෙපාර්තමේන්තුවට යොමුකර වාර්තාවක් ලබා ගැනීමට පොලිසිය කටයුතු කර ඇත.
තෙල්දෙණිය ජ්‍යෙෂ්ඨ පොලිස් අධිකාරි නීතිඥ රොෂාන් අමරසිංහ මහතාගේ සහ සහකාර පොලිස් අධිකාරි අංගම්මන මහතාගේ උපදෙස් මත තෙල්දෙණිය කොට්ඨාස අපරාධ විමර්ශන ඒකකයේ ස්ථානාධිපති ප්‍රධාන පොලිස් පරීක්ෂක දිසානායක මහතාගේ මෙහෙයවීමෙන් පරීක්ෂණ පැවැත්වෙයි.
