කොළඹ මහාධිකරණයේ විභාග වන අපරාධ නඩුවක විත්තිකරුවකු වෙනුවෙන් පෙනී සිටීම සඳහා අධිකරණය පත්කර සිටියදී, එම නඩුවට පෙනී නොසිටීමෙන් වෘත්තිය ආචාරධර්ම කඩකිරීම සම්බන්ධයෙන් වරද පිළිගත් නීතිඥවරයකුට වසර පහක කාලයක් නීතිඥ ධුරයේ කටයුතු කිරීම අත්හිටුවීමට ශ්‍රේෂ්ඨාධිකරණය තීරණය කළේය.
එම නීතිඥවරයාට එරෙහිව කොළඹ මහාධිකරණ විනිසුරු ආදිත්‍ය බාලපටබැඳි මහතා කරන ලද පැමිණිල්ලක් විභාග කර අවසන් කර එහි තීන්දුව ප්‍රකාශ කරමින් පසුගිය 30 වැනිදා ශ්‍රේෂ්ඨාධිකරණය මේ බව තීරණය කළේය. ශ්‍රේෂ්ඨාධිකරණ විනිසුරුවරුන් වන මහින්ද සමයවර්ධන සහ අර්ජුන ඔබේසේකර මහත්වරුන්ගේ එකඟත්වයෙන් යුතු නඩු තීන්දුව ශ්‍රේෂ්ඨාධිකරණ විනිසුරු එස්. තුරෙයිරාජා මහතා ප්‍රකාශයට පත්කරන ලද තීන්දුවේ මෙසේ සඳහන් වේ.
කොළඹ මහාධිකරණ හමුවේ විභාග වන නඩුවක විත්තිකරුවකු වෙනුවෙන් නීතීඥයකු ලෙස පෙනී නොසිටීම හේතුවෙන් නීතිඥ ආර්.ඩී. රණවීර මහතා වෙනුවෙන් පෙනී සිටීම සඳහා අධිකරණය මෙම වගඋත්තරකාර නීතිඥවරයා නම් කරනු ලැබ තිබූ බව නඩු තීන්දුවෙහි සඳහන් වේ. එහෙත් එම නඩුව කැඳවූ අවස්ථා තුනක දීම අධිකරණය හමුවේ පෙනී සිටීමට ඔහු අසමත් වී ඇති බව එහි සඳහන් වේ.
පසුව කොළඹ මහාධිකරණ විනිසුරු ආදිත්‍ය බාලපටබැඳි මහතා මේ සම්බන්ධයෙන් ශ්‍රේෂ්ඨාධිකරණයට පැමිණිල්ලක් කෙරිණි. මේ සම්බන්ධ පැමිණිල්ල අධිකරණය සලකා බැලූ අවස්ථාවේදී විත්තිකාර නීතිඥවරයා විසින් අදාළ චෝදනාවට වරද පිළිගෙන ඇත. තමන්ගේ පියා දැඩි ලෙස රෝගාතුර වීම ඇතුළු කරුණු කිහිපයක් හේතුවෙන් අදාළ නඩුවලට පෙනී සිටීමට නොහැකිවූ බවට විත්තිකාර නීතිඥවරයා එහිදී කරුණු ඉදිරිපත් කළ බව නඩු තීන්දුවෙහි සඳහන් වේ.
ඉදිරිපත් වූ කරුණු අනුව විත්තිකාර නීතිඥවරයා වරද පිළිගැනීම අනුවත් ඔහු අදාළ චෝදනාවට වරදකරු කරන බව තීන්දුවේ සඳහන් වේ. අදාළ ක්‍රියාව නිසා ඔහු නීතිඥ වෘත්තියේ ආචාරධර්ම කඩ කර ඇති බවට ශ්‍රේෂ්ඨාධිකරණය තීරණය කර තිබේ. විත්තිකාර නීතිඥවරයාගේ වයසත් ඔහු මුල් අවස්ථාවේදී වරද පිළිගැනීමත් ආදිය සලකා බලා ඔහු නීතිඥ වෘත්තියේ යෙදීම වසර පහක කාලයකට අත්හිටුවන බවද තීන්දුවේ වැඩිදුරටත් සඳහන් කර ඇත.
වගඋත්තරකාර නීතිඥවරයා වෙනුවෙන් නීතිඥ සුරෙන් ඥානරාජ් සමඟ ජනාධිපති නීතිඥ සාලිය පීරිස් මහතා පෙනී සිටියේය. නීතිපති වෙනුවෙන් රජයේ ජ්‍යෙෂ්ඨ නීතිඥ උදාර කරුණාතිලක මහතා පෙනී සිටියේය.
