හම්බන්තොට දිස්ත්‍රික්කය තුළ නිෂ්පාදිත අතිරික්ත පලතුරුවලට ඉහළ මිලක් ගොවීන්ට ලබාදීමට පලතුරු පල්ප සකස් කිරීමේ මධ්‍යස්ථානයක් ආරම්භ කර තිබේ.
කෘෂිකර්ම දෙපාර්තමේන්තුවේ ජාතික පසු අස්වනු කළමනාකරණ ආයතනයේ මූල්‍ය හා තාක්ෂණික දායකත්වය යටතේ මෙම මධ්‍යස්ථානය හම්බන්තොට මයුරපුර ප්‍රදේශයේදී පසුගියදා (28) විවෘත කෙරිණ. ශ්‍රී ලංකාවේ පලතුරු අගයදාමයේ පාර්ශ්වකරුවන් සවිබල ගැන්වීම සඳහා පලතුරු සැකසීමේ මධ්‍යස්ථාන ස්ථාපිත කිරීමේ ව්‍යාපෘතිය යටතේ මෙම මධ්‍යස්ථානය ආරම්භ කර ඇත.
හම්බන්තොටට ආවේණික වූ නිෂ්පාදිත පලතුරු වර්ග වන පැෂන්, අඹ, දිවුල්, කටු අනෝදා වැනි පලතුරුවල පල්ප සකස් කර දේශීය හා විදේශීය වෙළෙඳපොළ කරා යැවීම මෙම මධ්‍යස්ථානය මඟින් සිදු කෙරේ. එම පලතුරු අතිරික්ත කාලයට ගොවියාට නිසි මිලක් ලබා ගැනීමට නොහැකි හෙයින් පලතුරු ඉවත් කිරීම පවා සිදු වේ. මෙවැනි මධ්‍යස්ථානයක් ආරම්භ කිරීම තුළින් එවැනි අතිරික්ත කාලයකට පලතුරු සඳහා ගොවියාට ඉහළ මිලක් ලබා ගැනීමට මෙමඟින් අවස්ථාව උදා වේ.
මෙම මධ්‍යස්ථානය විවෘත කිරීම හම්බන්තොට අතිරේක දිස්ත්‍රික් ලේකම් එම්.කේ.ඒ. අංජලා අමාලි මහත්මියගේ ප්‍රධානත්වයෙන් සිදු විය.
මෙම අවස්ථාවට සහභාගී වූ ජාතික පසු අස්වනු කළමනාකරණ ආයතනයේ වත්මන් සභාපති මහාචාර්ය රෝහිත ප්‍රසන්න මහතා කියා සිටියේ නව රජය ව්‍යවසායකයන් සමඟ ඒකාබද්ධව තාක්ෂණය යොදා ගනිමින් මෙරට කෘෂි නිෂ්පාදනවලින් ඉවතලන ප්‍රමාණය අඩු කර ගැනීමට මෙවැනි මධ්‍යස්ථාන ආරම්භ කරන බවයි.
