රුහුණ විශ්වවිද්‍යාලයේ උපකුලපති සහ නියෝජ්‍ය උපකුලපති ශිෂ්‍ය මර්දනයක නිරතව සිටින බැවින් ඔවුන් වහා ඉවත් කරන ලෙස ඉල්ලමින් රුහුණ විශ්වවිද්‍යාලයේ මහාශිෂ්‍ය සංගමයේ මෙහෙයවීමෙන් පැවති මහා උද්ඝෝෂණයක් පෙරේදා (29) සවස මාතර බස්නැවතුම්පොළ ඉදිරිපිටදී පැවැත්විණි.
රුහුණ විශ්වවිද්‍යාලයේ අධ්‍යයන පීඨ පහකට අයත් ශිෂ්‍ය ශිෂ්‍යාවෝ විශාල පිරිසක් මාතර වැල්ලමඩම රුහුණ විශ්වවිද්‍යාල පරිශ්‍රයේ සිට විරෝධතා පුවරු රැගෙන සටන් පාඨ කියමින් තංගල්ල – මාතර ප්‍රධාන මාර්ගය ඔස්සේ මාතර නගර මධ්‍යයට පැමිණ උද්ඝෝෂණයේ නිරතව සිටියහ.
රුහුණ විශ්වවිද්‍යාලයේ උපකුලපති වහා ඉවත් කර පාලනය පිළිබඳ විමර්ශනය කිරීම සඳහා ස්වාධීන කොමිසමක් පත් කරන ලෙසත්, නියෝජ්‍ය උපකුලපති ඉවත් කර ශිෂ්‍ය නිදහස ආරක්ෂා කරමින් අත්තනෝමතික ලෙස ලබා දී ඇති පන්ති තහනම්, ශිෂ්‍යභාවය අහෝසි කිරීම් වහා ඉවත් කරන ලෙසත් උද්ඝෝෂණයට එක්ව සිටි ශිෂ්‍ය කණ්ඩායම් ඉල්ලා සිටියහ.
