අම්බලන්තොට, තාලිගල ප්‍රදේශයේ කෙසෙල් වගා බිම්වලට ඉකුත් 28 වැනිදා රාත්‍රියේ කඩාවැදුණු වනඅලින්, කෙසෙල් වගාවන් විනාශ කර ඇති බව ප්‍රදේශවාසීහු පවසති. මදුනාගල රක්ෂිත ප්‍රදේශයේ සිට වලවේ ගඟ හරහා මෙගොඩට පැමිණෙන වනඅලින්, ජනයා බහුල වශයෙන් ජීවත්වන ගම්මානවලට පැමිණ කෙසෙල් වගාවන්ට දැඩි ලෙස හානි කරන බව ද ඔවුහු කියති. ඉතාම දුක් මහන්සියෙන් ආරම්භ කර ඇති කෙසෙල් වගා බිම්වල අස්වනු කපා ගැනීමට ආසන්න කාලයකදී මෙලෙස වනඅලින් පැමිණ කෙසෙල් වගා විනාශ කිරීමෙන් විශාල පාඩුවක් සිදුවන හෙයින්, ඒ සඳහා වන්දියක්වත් ලබා දීමට පියවර ගන්නැයි කෙසෙල් ගොවියෝ ඉල්ලා සිටිති. අම්බලන්තොට ප්‍රාදේශීය ලේකම් කොට්ඨාසයේ තාලිගල, බරවකුඹුක, වැටිය, රෝටේ, උඩ රෝටේ, ලියන්ගස්තොට, පල්ලෙරොට ඇතුළු තදාසන්න ගම්මානවලට මෙම වනඅලි තර්ජනය මෑත කාලයේ එල්ල වෙමින් පවතී. වන අලින් ගම් වැදීමට නුහුරු නුපුරුදු මෙම ගම්මානවල ජීවත් වන ජනතාව සිය දෛනික කටයුතු සිදුකරමින් සිටින අවස්ථාවන්හිදී අනපේක්ෂිත ලෙස වන අලින් පැමිණීමෙන්, ජීවිත හා දේපොළවලට බරපතළ තත්ත්වයේ තර්ජන එල්ල විය හැකි බව ද ජනතාව සඳහන් කරති. මේ සම්බන්ධයෙන් අම්බලන්තොට ප්‍රාදේශීය ලේකම් ඩී.එස්. රණසිංහ මහත්මිය කියා සිටියේ, අම්බලන්තොට ග්‍රාම නිලධාරී වසම් කිහිපයකට මෑත කාලයේ සිට එල්ල වී ඇති මෙම වනඅලි ගැටලුවට ස්ථීර විසඳුමක් ලැබී නැති බවයි.
