රජරට අමරපුර සිරි සද්ධම්මවංශ මහ නිකායෙහි සුධර්මා කාරක සංඝ සභාව වෙතින් සද්ධර්ම කීර්ති ශ්‍රී සරණතිස්ස වංශාවතංස යන ගරු නාම සම්මුතිය සහිතව, අමරපුර සිරි සද්ධම්මවංශ මහා නිකායේ උතුර, උතුරුමැද දෙපළාතේ උප ප්‍රධාන සංඝනායක පදවියෙන් පසුගියදා පිදුම් ලැබූ කලාඔය සිරි විජය බෝධිරාජාධිපති පූජ්‍ය රන්දොඹේ පියනන්ද හිමියන්ව පිළිගැනීමේ පුණ්‍ය මහෝත්සවයක් කලාඔය සිරි විජය බෝධිරාජාරාමයේදී පැවැත්විණි. කලාඔය සිරි විජයබෝධිරාජාරාම විහාරස්ථ දායක සභාව මෙම පුණ්‍ය මහෝත්සවය සංවිධාන කර තිබිණි. මෙහිදී පුත්තලම – අනුරාධපුර මාර්ගයේ අළුත්ගම මහින්දාරාම විහාරස්ථානය ඉදිරිපිට සිට නොච්චියාගම දක්වාත්, අනතුරුව නොච්චියාගම සිට නැවත රාජාංගණය පුත්ලම්හන්දිය දක්වාත් රිය පෙරහරකින් අභිනව උප ප්‍රධාන සංඝනායක රන්දොඹේ පියනන්ද හිමියන්ව වැඩම කරවීම සිදු විය. එතැන් සිට මීටර් හයසීයක පමණ දුරකින් පිහිටි කලාඔය සිරි විජයබෝධිරාජාරාම විහාරස්ථානය වෙත අලංකාරවත් පාගමන් පෙරහරකින් රන්දොඹේ පියනන්ද හිමියන්ව වැඩම කරවූහ. අනතුරුව විජයබෝධිරාජාරාම විහාරස්ථානයේදී උත්සව සභාවේ කටයුතු ආරම්භ කෙරිණි. අම්බලම්ගොඩ, මාදම්පේ, කුලීගොඩ වනවාස රාජමහා විහාරාධිපති, අමරපුර සිරිසද්ධම්මවංශ මහා නිකායේ අනුනායක පූජ්‍ය මාදම්පේ විමලධජ නායක ස්වාමීන් වහන්සේ උත්සව සභාවේ මූලාසනය හොබවමින් පිරිස පංචශීලයෙහි පිහිටුවා පසුව ප්‍රධාන අනුශාසනාව ද උන්වහන්සේ විසින් සිදුකරනු ලැබූහ.
