නැඟෙනහිර පළාතේ පළාත් පාලන ආයතනවල ක්‍රියාකාරීත්වය දේශපාලන මැදිහත්වීම්වලින් තොරව පවත්වාගෙන යන ලෙසත්, පළාත් පාලන ආයතනවල කටයුතුවලට ඇඟිලි ගැසීමට දේශපාලනඥයන්ට කිසිසේත් ඉඩ නොතැබිය යුතු බවත් පළාත් ආණ්ඩුකාර, මහාචාර්ය ජයන්තලාල් රත්නායක මහතා පැවසීය. ඒ මහතා මේ බව පැවසුවේ පෙරේදා (29) මඩකලපුව සහකාර පළාත් පාලන කොමසාරිස් කාර්යාලයේ පැවති විශේෂ රැස්වීමකදී ය. මෙම දිස්ත්‍රික්කයේ කටයුතු සඳහා මඩකලපුව මහ නගර සභාව, කාත්තන්කුඩි සහ එරාවුර් නගර සභාව ඇතුළු ප්‍රාදේශීය සභා 14ක ලේකම්වරුන් ඇතුළත් වන අතර විශේෂ කොමසාරිස්වරයා ඇතුළු පළාත් පාලන දෙපාර්තමේන්තුවේ නිලධාරීහු රැසක් මෙහි පැමිණ සිටියහ. නැඟෙනහිර පළාත් ආණ්ඩුකාරවරයාගේ ලේකම් එස්. මදනායක, ආණ්ඩුකාරවරයාගේ සම්බන්ධීකරණ ලේකම් යූ.කේ.එම්. අබ්දුල්ලා, මඩකලපුව දිස්ත්‍රික් සහකාර පළාත් පාලන කොමසාරිස් ඒ. ප්‍රකාශ් යන මහත්වරුන් ඇතුළු නිලධාරීහු රැසක් මෙහි පැමිණ සිටියහ. මෙම විශේෂ රැස්වීමේදී මෙම දිස්ත්‍රික්කයේ ඝන අපද්‍රව්‍ය කළමනාකරණය ක්‍රියාත්මක කිරීමට අවශ්‍ය ක්‍රියාමාර්ග පිළිබඳව සාකච්ඡා කෙරිණි.
මෙහිදී අදහස් දැක්වූ මහාචාර්ය ජයන්ත රත්නායක මහතා කියා සිටියේ, පළාත් පාලන ආයතනවල සහ ප්‍රාදේශීය සභා කළමනාකරණය යටතේ පවතින අක්‍රිය වාහන කඩිනමින් අලුත්වැඩියා කළ යුතු බවයි. භාවිතයට ගත නොහැකි පැරණි වාහන සම්පත්වලින් ඉවත් කර වෙන්දේසියෙන් විකිණීමට පියවර ගැනීමට නීතිමය වාර්තාවක් ඉදිරිපත් කරන ලෙස ද රත්නායක මහතා නියෝග කළේය. එමෙන්ම ඒ මහතා වැඩිදුරටත් ප්‍රකාශ කළේ මහ නගර සභාව, නගර සභාව ඇතුළු ප්‍රාදේශීය සභාවල කටයුතු ජනතාවගේ දෙපතුළට ළඟා විය යුතු බවත්, ජනතාව එය අනුමත කළ යුතු බවත් ය.
