යාපනයේ වෛද්‍යවරියක් විසින් මෝටර් රථයක් අධික වේගයෙන් හා අපරීක්ෂාකාරි ලෙස ධාවනය කිරීම නිසා එම මෝටර් රථය යතුරුපැදියක හා ත්‍රිරෝද රථයක ගැටීමෙන් පෙරේදා (29) තුන්දෙනකු තුවාල ලබා තිබේ.
යාපනයේ වඩුක්කෝඩෙයි සිට අධික වේගයෙන් පැමිණි මෝටර් රථය යාපනයේ තෙලිප්පලෙයි පාරේ පිහිටි පාසලක් ඉදිරිපිටදී මුලින්ම ත්‍රිරෝද රථයක ගැටී තිබේ.
ඒ අවස්ථාවේදී මෝටර් රථය නොනැවතී ඉදිරියටම ධාවනය වීමෙන් පසුව යතුරුපැදියක ගැටී ඇත. යතුරුපැදිය පදවා ගෙන ගිය පුද්ගලයාත් ත්‍රිරෝද රථයේ සිටි අයෙකුත් මහමඟ ගමන් කරමින් සිටි අයකුත් මෝටර් රථයේ ගැටීම නිසා තුවාල ලබා තෙලිප්පලෙයි රෝහලට ඇතුළත් කොට තිබේ.
තුවාලකරුවන් තුන්දෙනාගෙන් එක් අයෙකුගේ තත්ත්වය බරපතළ බැවින් ඔහුව යාපනය ශික්ෂණ රෝහල වෙත මාරු කොට යවා තිබේ.
සිද්ධිය සම්බන්ධයෙන් තෙලිප්පලෙයි පොලිසිය වෛද්‍යවරිය අත්අඩංගුවට ගෙන පොලිස් ඇප මත නිදහස් කොට ඇති අතර මෙම අනතුර සම්බන්ධයෙන් පරීක්ෂණ පවත්වාගෙන යයි.
