සබරගමුව විශ්වවිද්‍යාලයේ දැනට පවතින නේවාසිකාගාර ගැටලුව සහ තවත් ගැටලු කිහිපයක් මුල් කරගනිමින් මහා ශිෂ්‍ය සංගමය නියෝජනය කරන සිසුහු පිරිසක් පෙරේදා (29) රාත්‍රියේ කොළඹ බදුල්ල ප්‍රධාන මාර්ගයේ පඹහින්න මංසන්ධියේදී එක් මංතීරුවක් අවහිර කරමින් පන්දම් දල්වමින් විරෝධතාවක නිරතවුහ. සබරගමුව විශ්වවිද්‍යාලයේ ප්‍රධාන පිවිසුම අසල සිට පන්දම් දල්වමින් පාගමනින් පඹහින්න මංසන්ධියට පැමිණ එහිදී විරෝධතාවය ආරම්භ කළහ.
එම සිසුන් පවසා සිටියේ සබරගමුව විශ්වවිද්‍යාලයේ නේවාසිකාගාර ගැටලුව දීර්ඝ කාලයක සිට පවතින බවයි. එයට විසඳුමක් ලබා දීම සඳහා කිසිම රජයක් කටයුතු කර නොමැති බවත් එමෙන්ම ක්‍රීඩා සහ සුබසාධක ගැටලුවලටද මෙතෙක් විසඳුමක් ලැබී නොමැති බවට ඔවුහු චෝදනා කර සිටියහ.
මහාශිෂ්‍ය සංගමයේ සභාපති ක්‍රිෂ්ණක නෙරංජන් මාධ්‍ය වෙත අදහස් දක්වමින් පවසා සිටියේ මෙම ගැටලුවලට අදාළ බලධාරීන් වහාම විසඳුම් ලබා දීමට කටයුතු කළ යුතු බවයි.
