බඳින තුවක්කුවකින් නිවෙස තුළ වෙඩි තබාගෙන මියගිය පුද්ගලයකුගේ මළ සිරුරක් යටියන්තොට, රේල්පාර, පහළ ගරාගොඩ ප්‍රදේශයේ නිවෙසකින් පෙරේදා (29 ) හමුවූ බව යටියන්තොට පොලිසිය පවසයි.
මෙසේ මියගොස් ඇත්තේ වෘත්තියෙන් පෙදරේරුවකු වන 46 හැවිරිදි රණවීරගේ සුජීව සනත් කුමාර නමැති විවාහක පුද්ගලයෙකි.
තිදරු පියකු වන මොහු නිවෙස තුළදී මෙරට නිෂ්පාදිත බඳින තුවක්කුව ආධාරයෙන් වෙඩි තබා ගත් අවස්ථාවේ ඒ අසල තවත් පත්තු නොවූ තුවක්කුවක් ද වූ බවත් පොලිසිය පවසයි.
විමර්ශන සිදු කරන අතර මරණයට හේතුව පවුලේ ආරවුලක් විය හැකි බවට පොලිසිය සැක පහළ කරයි.
මියගිය අයගේ සිරුර අවිස්සාවේල්ල මූලික රෝහලට රැගෙන ගිය අතර පස්චාත් මරණ පරීක්ෂණය සිදු කිරීමට නියමිතව ඇත.
යටියන්තොට පොලිසියේ ස්ථානාධිපති ප්‍රධාන පොලිස් පරීක්ෂක ඊ.එන්.පී. ඒකනායක මහතාගේ උපදෙස් පරිදි විමර්ශන නිලධාරී උප පොලිස් පරීක්ෂක ජයකොඩි ඇතුළු නිලධාරීහු කණ්ඩායමක් විසින් වැඩිදුර විමර්ශන සිදු කරති.
