ලබන වසරේදී සංචාරකයන් මිලියන හතරක් මෙරටට ගෙන්වා ගැනීම ඉලක්ක කොට සංචාරක ආදායම වැඩි කර ගැනීමේ විධිමත් වැඩපිළිවෙළක් ක්‍රියාත්මක කරන බව ජාතික ජන බලවේගයේ කළුතර දිස්ත්‍රික් අපේක්ෂක, වෛද්‍ය නලින්ද ජයතිස්ස මහතා ප්‍රකාශ කළේය. මේ පිළිබඳව වැඩිදුරටත් අදහස් දැක්වූ ඒ මහතා මෙසේ ද කීවේය.
“අපේ රටට වැඩි වශයෙන් සංචාරකයන් ගෙන්වා ගනිමින් ඉහළ ආදායමක් ගැනීමට කටයුතු කරනවා. ඒ සඳහා අවශ්‍ය යටිතල පහසුකම් ඇතුළු සියලු සම්පත් වැඩි දියුණු කිරීමට පිරිපුන් සහයෝගයක් රජය දෙනවා.
මහ මැතිවරණයට කළුතර දිස්ත්‍රික්කයෙන් ඉදිරිපත්වී තිබෙන අපේ කණ්ඩායමේ බලාපොරොත්තුව මන්ත්‍රී ධුර එකොළහෙන් අටක් ගැනීමයි.
ජාතික ආර්ථිකය දියුණු කිරීම සමඟින් ග්‍රාමීය ආර්ථික සංවර්ධනය සහ පොදු ජනතාවගේ සුබසාධනය, යටිතල පහසුකම් සංවර්ධනය ජීවනෝපාය සවිබල ගැන්වීම රජයේ ප්‍රමුඛ කාර්යයක්. ඉතිහාසයේ මෙතෙක් පැවැති රජයන් මෙගා ව්‍යාපෘතිවලට මුල්තැන දෙමින් යටිතල පහසුකම් සංවර්ධන කටයුතු අමතක කර තිබීම පාඩමකට ගෙන අපේ රජය කටයුතු කරනවා.
රාජ්‍ය සේවයේ ඵලදායිතාව, කාර්යක්ෂමතාව ඉහළ නැංවීමට සහ මහජනතාවට වඩාත් පහසුවෙන් මිත්‍රශීලීව සේවා ගැනීමට හැකි වන ආකාරයට රාජ්‍ය සේවය මුළුමනින්ම ඩිජිටල්කරණයට ලක් කරනවා. නව නිෂ්පාදන ආර්ථිකයකට මුල පුරනවා.”
