රන්ජන් රාමනායක මහතා තමන්ගේ ප්‍රජා අයිතිය සම්බන්ධයෙන් පැහැදිලි ප්‍රසිද්ධ ප්‍රකාශයක් කළ යුතු බවත්, එක්සත් ප්‍රජාතන්ත්‍රවාදි හඬ පක්ෂයේ නීත්‍යනුකූලභාවය සම්බන්ධයෙන් මැතිවරණ කොමිසමේ කඩිනම් විමර්ශනයක් අවශ්‍ය බවත් එම පක්ෂයේ කොළඹ දිස්ත්‍රික් අපේක්ෂක ප්‍රසන්න අධිකාරී මහතා පැවැසීය.
ඒ මහතා මේ බව පැවැසුවේ ඊයේ (30) කොළඹදී පැවැති මාධ්‍ය හමුවකදීය.
එහිදී වැඩිදුරටත් අදහස් දැක්වූ ඒ මහතා මෙසේ ද කීවේය.
“මම මහමැතිවරණයට එක්සත් ප්‍රජාතන්ත්‍රවාදී හඬ පක්ෂයෙන් තරග කරන්න නියමිතව සිටි අපේක්ෂකයෙක්. එම පක්ෂයෙන් මැතිවරණයට ඉදිරිපත් වුණත් ඉතා කෙටි කාලයකදී පක්ෂය සම්බන්ධයෙන් ගැටලු රැසක් පැන නැඟුණා.
එක්සත් ප්‍රජාතන්ත්‍රවාදි හඬ පක්ෂය කාගෙද? ව්‍යවස්ථාව මොන පක්ෂයේද? පක්ෂ සමුළුවේදී මොකද වුණේ? ප්‍රජා අයිතිය නැති නායකයෙක්? ද්විත්ව පුරවැසිභාවය හිමි ජාතික සංවිධායකවරයෙක් සම්බන්ධයෙන් සමාජය තුළ ගැටලු රැසක් පැන නැඟුණා.
මේ පිළිබඳව මම සොයා බැලුවා. පක්ෂයේ නායක රන්ජන් රාමනායක කිව්වේ මේ පක්ෂය අලුත් පක්ෂයක් කියලා. අල්ලස දූෂණය පිටු දකින නායකයෙක් විදිහට අලුත් පක්ෂයක් ගොඩනඟන බවයි කිව්වේ. නමුත් මේ පිළිබඳ සොයා බැලීමේදී මැතිවරණ කොමිසමේ ලියාපදිංචි වූ නව පක්ෂයක් නොවන බව අනාවරණය වුණා.
මැතිවරණ කොමිසමේ ලියාපදිංචි පක්ෂ ලැයිස්තුවේ පක්ෂය ලෙස සඳහන් වෙන්නේ එක්සත් කොංග්‍රස් පක්ෂය කියලා. පක්ෂ නායකයා වශයෙන් රන්ජන් රාමනායකවත් පක්ෂයේ ජාතික සංවිධායක වශයෙන් ටී. එම්. දිල්ෂාන්ගෙත් නම් කිසිම තැනක සඳහන් වෙන්නේ නෑ. පක්ෂයේ ලේකම් විදිහට ලියකියවිලි තියෙන්නේ ගෝවින්දස්වාමී ජයසීලන් කියලයි. නාමයෝජනා දුන්නට අපි මේ කියන පුද්ගලයා දැකලවත් නෑ. කණ්ඩායම් නායකයා විදිහට අපි දැක්කේ වෛද්‍ය පැතුම් කර්නල්. කණ්ඩායම් නායකයාට අනුව නාමයෝජනා දෙන්න කටයුතු කළා. එක්සත් ප්‍රජාතන්ත්‍රවාදි හඬ පක්ෂය තාවකාලිකව නම වෙනස් කරගෙන මෙවර මැතිවරණයට පමණක් ඉදිරිපත් වන පක්ෂයක්. මෙවර මැතිවරණයෙන් අනතුරුව පක්ෂය අහෝසිවී යනවා. මේ පිළිබඳව වහාම විමර්ශනයක් සිදු කළ යුතුයි. මේක හරියට නංගි පෙන්නලා අක්කා දුන්නා වගේ දෙයක්.”
පක්ෂ සමුළුවක් කියලා එකක් තිබුණා. හැබැයි නිලධාරී මණ්ඩලයක් පත් කළේ නෑ. අනෙක් සමුළුවල වගේ ඉදිරි යෝජනා ඉදිරිපත් කළේ නැහැ. මැතිවරණ ප්‍රකාශයක් නැහැ. පක්ෂයේ මැතිවරණ ප්‍රකාශනයක් අපි තවම ඇහැට දැක්කේ නැහැ. මොකක්ද මේ අයගේ රට හදන වැඩපිළිවෙළ? රන්ජන් අයියා වන්ශොට් එකක් කළා වගේම මාධ්‍ය සංදර්ශනයක් කළා. පක්ෂයේ ප්‍රතිපත්ති සහ වැඩපිළිවෙළ වගේම නිලධාරී මණ්ඩලයකුත් නෑ, තනිකර ෂෝ එකක්.
ඡායාරූපය – චින්තක කුමාරසිංහ
