දුම්රිය ස්ථානාධිපතිවරුන්ගේ සංගමය ආරම්භ කළ වෘත්තීය ක්‍රියාමාර්ගය හේතුවෙන් සේවය නිම වී නිවෙස් බලා යෑමට පැමිණි මඟීන් ඊයේ (30) දැඩි අපහසුතාවට පත්වූහ. එම වෘත්තීය ක්‍රියාමාර්ගය හේතුවෙන් දුම්රිය ප්‍රවේශ පත්‍ර නිකුත් නොකිරීම නිසා මඟින් ප්‍රවේශ පත්‍ර නොමැතිව ගමන් කළ අතර ඉන් දුම්රිය දෙපාර්තමේන්තුවට විශාල මූල්‍යමය පාඩුවක් සිදුව ඇති බව දුම්රිය දෙපාර්තමේන්තුව පවසයි.
ස්ථානාධිපතිවරුන්ගේ වෘත්තීය ක්‍රියාමාර්ගය නිසා දුම්රිය කිහිපයක් ධාවනය කිරීම අවලංගු කිරීමට සිදුව ඇති අතර ඇතැම් දුම්රිය ධාවනය කර ජනතාවට සිදුවන අපහසුතාව වළක්වා ගැනීමට පියවර ගත් බව එම දෙපාර්තමේන්තුව සඳහන් කරයි.
වසර පහෙන් පහට ශ්‍රේණි උසස් වීමේ කටයුතු ප්‍රමාදවීම හා දුම්රිය ස්ථානාධිපතිවරුන්ගේ බඳවා ගැනීමේ පටිපාටිය දිගින් දිගටම ප්‍රමාද වීම ඇතුළු කරුණු කිහිපයක් මුල් කරගනිමින් වෘත්තීය ක්‍රියාමාර්ගය ආරම්භ කර තිබුණ ද, අදාළ උස්සවීම් ලබාදීම හා බඳවා ගැනීමේ පටිපාටිය අනුමත කර ගැනීමට අවශ්‍ය පියවර මේ වන විටත් දෙපාර්තමේන්තුව විසින් ක්‍රියාත්මක කර ඇති බව වැඩබලන දුම්රිය සාමාන්‍යාධිකාරී එස්.එස් මුදලිගේ මහතා නිවේදනයක් නිකුත් කරමින් සඳහන් කරයි.
