පොදු ස්ථානයක දී පොලිස් නිලධාරීන්ගේ ක්‍රියාකාරකම් වීඩියෝගත කිරීම කිසිදු නීතියකින් වළක්වා නොමැති බව වැඩබලන පොලිස්පති ප්‍රියන්ත වීරසූරිය මහතා විසින් පොලිස් නිලධාරීන්ට විශේෂ දැනුම්දීමක් නිකුත් කර තිබේ.
ඒ අනුව, එවැනි වීඩියෝගත කිරීම් කිසිම පොලිස් නිලධාරියෙක් විසින් වැළැක්වීම නොකළ යුතු බව අදාළ දැනුම් දීමේ සඳහන් වේ.
දිවයිනේ සියලුම පොලිස් නිලධාරීන් වෙත යොමු කර ඇති මෙහි සඳහන් වෙන්නේ, සංස්කරණය නොකළ වීඩියෝ හඬපට අධිකරණයක දී සාක්ෂි ලෙස පිළිගන්නා වැදගත් සාධකයක් බැවින්, පොලිස් නිලධාරීන් එවැනි වීඩියෝ කිරීම් වැලැක්වීම නොකළ යුතු බවයි.
එබැවින් පොදු ස්ථානවල සිදුවන පොලිස් ක්‍රියාකාරකම් වීඩියෝගත කිරීමට බාධා නොකළ යුතුවා සේම, පොලිස් දෙපාර්තමේන්තුවට සහ පොලිස් සේවයට කැළලක් වන ආකාරයට සංස්කරණය කළ වීඩියෝ පට සමාජගත කළහොත්, ඒ සම්බන්ධව නීතිමය පියවර ගැනීමට මෙම උපදෙස් බාධාවක් නොවන බව වැඩිදුරටත් සඳහන් වේ.
